L’agua respetará un Llunes d’Antroxu marcáu pol fríu

Asturies, depués de delles xornaes de nevaes y lluvies fuertes, va vivir una tregua marcada por una importante baxada de les temperatures, lo que va permitir la celebración del Llunes d’Antroxu. Los ádenes son agora la principal preocupación tres el temporal.

Esti llunes ye Llunes d’Antroxu y miles d’asturianos miren al cielu pa poder antroxar xunto con familiares y collacios. Según la predicción de l’Axencia Estatal de Meteoroloxía (Aemet) la xornada va tar marcada por una baxada brusca de les temperatures, que yá tamos notando, y l’ausencia d’agua según avanza’l día, con posibles lluvies bien entrada la madrugada.

Xixón, ciudá que concentra la mayor celebración –mañana ye festivo nel conceyu–, ta preparando yá’l desfile d’Antroxu, previstu pa les 19 hores, con salida de la plaza de toros d’El Bibio y final en L’Humedal. La predicción ye que nun va cayer agua dende les 17 hores hasta les 6 de la mañana, con una temperatura mínima de 6 graos mientres el pasucais y de 3 pela madrugada, con una sensación térmica de -1 grau pa los qu’allarguen la nueche.

Tarna y Ventana, cortaos

La posibilidá d’ádenes ye’l mayor esmolecimientu y peligru esistente agora n’Asturies tres delles xornaes de nevaes en gran parte del territoriu. Estos argayos de nieve provocaron yá’l zarru al tráficu de los puertos de Tarna y Ventana y de trés tramos de carretera: l’AS-264, ente Poncebos y Sotres, l’AS-29 ente Santantolín y La Riela (ta ente Augüera'l Coutu y La Viña) y l’AS-228 entre Trubia y Ventana.

Nestos momento, ye necesario l’usu de cadenes en San Isidro –onde hai un avisu por altu riesgu d’ádenes–, Ḷḷeitariegos, Pozu las Muyeres Muertas y El Counio. Tamién hai avisu por riesgu d’argayos de nieve na AS-117 ente Riañu y Tarna, abierta al tráficu cola recomendación de circular con precaución. Pue consultar tola información sobre l'estáu de les carreteres al momentu calcando nesti enllaz.

Otra manera, na madrugada de mañana, dende les 3 a les 11 hores, l’occidente d’Asturies va tar n’alerta mariella por raches d’aire del sureste que podríen llegar hasta los 90 quilómetros per hora. Tamién hai avisu por riesgu en tola mariña del país por fenómenos costeros, que nel oriente comenzará a les 6 hores y va allargase mientres tol día.

Na semeya La Baúa, nel conceyu de Bimenes, esta fin de selmana.