“L'adaptación del reglamentu d’usu del asturianu na Universidá ye cumplir cola llegalidá vixente”, asegura Riaño

El Conseyu de Gobiernu de la Universidá d’Uviéu ta acabante d’aprobar el reglamu d’usu del asturianu na institución y la creación de la Comisión Asesora de Normalización Llingüística. Pa Xosé Antón González Riaño, presidente de l'ALLA, trátase de “una cuestión de normalidá y de cumplimientu de la llegalidá vixente” y acusa a Ciudadanos y PP de “esmazcarase” coles sos crítiques.

Esti pasu dau pola universidá asturiana trátase d’una adaptación del reglamentu yá esistente ellaboráu nel 2009, na etapa de Vicente Gotor al frente de la institución, que recoyía un usu del asturianu más restrictivu al arrequexase namái al Rexistru Xeneral y non a toles dependencies. Asina cúmplese una sentencia del Tribunal Superior de Xusticia d’Asturies y adecúase la norma al marcu llegal vixente, esto ye, la Llei d’Usu y Promoción del Bable/Asturianu y los propios estatutos de la Universidá d’Uviéu, como marca l’artículu 6.

“Ye una cuestión de normalidá y de cumplimientu de la llegalidá vixente”, afirma González Riaño. El tamién profesor universitariu destaca la “sensibilidá del equipu rectoral cola llingua y la cultura asturiana. Yá se pue dicir nestos momentos qu’enxamás hebo un equipu tan sensible con esti tema, qu’enllaza colos esistentes a finales del sieglu XIX y primeros del XX; colos rectores y caderalgos del Grupu d’Uviéu”.D’esta forma queda afitao qu’escritos, comunicaciones y solicitúes n’asturianu van ser almitíos pola institución, quedando la xunidá alministrativa responsable de la tramitación de los documentos presentaos n’asumir la tarea d’incorporar al espediente la traducción que se revele esencial pa siguir col procedimientu. Ello ye que la llingua que se va siguir emplegando nestos trámites ye’l castellanu, yá que’l reglamentu nuevu namái obliga a permitir que los ciudadanos puedan dirixise a la universidá n’asturianu.

Al empar, el Conseyu de Gobiernu dio’l preste a la creación de l’anunciada Comisión Asesora de Normalización Lingüística, órganu d’asesoramientu en rellaición al usu de la llingua asturianana universidá. La so puesta en marcha va ser inminente, namái s’espublice nel BOPA la resolución.

Crítiques de Ciudadanos y PP

Les dos úniques formaciones polítiques que criticaron esta adaptación d’un reglamentu yá esistente dientro de la universidá foron Ciudadanos y el Partido Popular (PP). En declaraciones a medios de comunicación, Nicanor García Fernández llegó a dicir que la Universidá d’Uviéu yera “l’avanzadina” de la normalización llingüística y que’l rector Santiago García Granda taba tomando una deriva política que nun-y correspondería, mentes que Luis Venta faló d’una oficialidá encubierta na institución.

“Dalgunos discursos del PP y Ciudadanos son contradictorios. Dicen que non a la oficialidá, qu’hai que desarrollar la Llei d’Usu, y cuando por fin se fai dalgo que diz la Llei d’Usu, pónense en contra. Con estas postura sobre’l reglamentu esmazcárense dafechu: oficialidá non y Llei d’Usu, tampoco”, afirma González Riaño, que llamenta l’interés de dambos partíos “en frenar cualquier avance na recuperación llingüística del asturianu, yá sía con estos posicionamientos o con denuncies”.

D’igual forma, tamién critica la intención de Mercedes Fernández, presidenta del PP d’Asturies, “de facer el ‘non a la oficialidá’ la exa y bandera de la so campaña eleutoral. Ye un retu social mui grave y va sali-y mal esi ataque a la cultura”, augura.

Na semeya, García Granda na rueda de prensa posterior al Conseyu de Gobiernu.