Lada va alendar tradición esta fin de selmana

L'Enguedeyu celebra'l so decimu aniversariu con música, baille y un mercáu.

Esti coleutivu de baille y música tradicional de Lada tien preparao una llarga llista d'actividaes coles qu'esperen celebrar los sos 'Diez años nel camín' xunto col restu de vecinos de Llangréu, de la cuenca'l Nalón y de toda Asturies. La primer cita del Enguedeyada va tener llugar mañana, con un conciertu de magar les 21.30 hores con Orpín, Skama la Rede, Duerna y La Tarrancha na carpa instalada frente a la ilesia.

Yá de sábadu va abrir les sos puertes el Mercáu Tradicional al meudía, que va tar amenizáu pola Banda Gaites Conceyu Llangréu (12.30 hores) y el Circo en la Luna (13 hores). De tarde'l turnu va ser pa los xuegos pa neños y neñes (17 hores) y pa una actuación nueva del Circo en la Luna (19 hores). Pa zarrar la xornada va entamase una Nueche en Danza con Cantaruxare y escenariu abiertu.

L'actividá del Mercáu Tradicional va principiar el domingu a les 11.30 hores con ambientación de gaita y tambor. A les 13.30 hores va ser el turnu de la tonada pa depués, a les 17.30 hores, finar les actividaes del aniversariu con una actuación de L'Enguedeyu.

Posibilidá de facer nueche nel albergue

Pa la xente que quiera desplazase a Lada y nun garrar el coche de nueche pa volver al so llar, esiste la posibilidá de dormir nel albergue llocal. Pa ello han de ponese en contautu con L'Enguedeyu al traviés de la rede social Facebook. La organización tamién recomienda avisar al traviés d'esta vía nel casu de querer apuntase al escenariu abiertu.