L’actu monárquicu en Cuadonga'l 8-S tuvo respuesta republicana y soberanista en Cangues

|
Manifestación 'Asturies nun tien rei. Soberanía y República'

Mientres los reis d’España y les sos dos fíes aportaben a Cuadonga’l 8 de setiembre, primer visita oficial de la princesa de Asturias Leonor al país, mediu millar de persones manifestábense en Cangues d'Onís baxo’l lema ‘Asturies nun tien rei. Soberanía y República’. La mayor parte d’ellos marcharon dende Les Arriondes.

Banderes d’Asturies y dalgunes españoles republicanes daben-y color a la filera de persones que percorrieron los siete quilómetros que separten dambes poblaciones. Cantares como ‘Fartones’, ‘Asturies nun tien rei’, ‘Los borbones a los tiburones’ y ‘Asturies mañana será republicana’ amenizaron el trayeutu.

En Prestín un grupu de ciudadanos esperaben la llegada de los manifestantes, que tomaron la carretera p’avanzar hacia la plaza xunto a la Casa Conceyu, onde finalmente se celebró la concentración. L’anéudota tuvo a la entrada de la villa, al pasar la ponte, cuando una persona se dedicó a facer el saludu fascista dende un balcón decoráu con una bandera d’España preconstitucional, provocando les risotaes de los presentes.

Numberosos turistes nun duldaron n’inmortalizar coles sos cámares la marcha, qu’aportó al llugar de la concentración pasaes les 13.30 hores. Nel llugar militantes de la iniciativa #LluchandoPolaSoberanía lleeron el comunicáu de la marcha y hebo una actuación musical.

Mientres, en Cuadonga, la visita real nun contó cola asistencia de públicu esperada pola organización pese a los autocares gratuitos que se punxeron a disposición de la ciudadanía a cargu de fondos públicos.

Restu d’actos del Día de la Nación Asturiana

Podemos y Izquierda Xunida celebraron el 8 setiembre con folixes de calter popular col Solarón y el Muséu del Pueblu d’Asturies como sede, de manera respeutiva. Nel casu de la formación morada destacó la presencia d’Iñigo Errejón, diputáu de Xuníos Podemos; Noelia Vera, covocera de Xuníos Podemos nel Congresu; Xulio Ferreiro, alcalde d’A Coruña; y la francesa Martine Billard, ex copresidenta del Parti de Gauche y coordinadora d’Ecoloxía de La France Insoumise.

Pela so parte, el Partíu Asturianiasta (PAS) celebró ayeri una xinta de xeremandía nel restorán El Pinal, en Pión. La celebración oficial, mentes, entamóse en Casu con una amplia programación mientres tola fin de selmana.

Contador Estadistiques