“L’acentu asturianu nun suel tener sitiu na ficción española”, diz Cotiello

|
“L’acentu asturianu nun suel tener sitiu na ficción española”, diz Cotiello

L’actriz María Cotiello ye la doctora asturiana Beatriz Reina na etapa nueva de ‘Centro Médico’, serie de La 1, qu’emplega con naturalidá el so acentu asturianu. “Faime muncha ilusión, pero tamién siento muncha responsabilidá”, diz la de Grillero sobre’l so papel nuevu.

“La idea de caltener l’acentu asturianu ye del productor José Velasco, de Zebra Producciones”, rellata Cotiello, que nun dulda al reconocer que “ye ún de los papeles más difíciles de la mio carrera. Nunca trabayara l’acentu y al tar enfrente d’una cámara automáticamente cambiólo”. Sicasí, esti retu afróntalo con “muncha ilusión”, pero tamién con “muncha responsabilidá” al saber que nun ye habitual que l’acentu asturianu tenga presencia de forma seria nuna ficción d’emisión de calter estatal.

“Tamos avezaos a ver l’acentu gallegu, andaluz, catalán o vascu, pero l’acentu asturianu nun suel tener sitiu na ficción española”, apunta la mierense, que recuerda pocos exemplos anteriores, como podría ser el casu de ‘Vientos de agua’. Por ello, Cotiello ta poniendo muncho enfotu nel so papel de médica asturiana fuera d’Asturies, “pa lo qu’intento falar como falo habitualmente con xente que nun fala asturianu”. 

Décima temporada

Les situaciones que va afrontar la doctora Reina en ‘Centro Médico’ pueden siguise toles tardes, de llunes a vienres, a les 18.15 hores en La 1. Trátase d’una serie que da un xiru esta décima temporada al pasar del formatu tipu documental de los sos anicios a otru más de serie tradicional, con trama, ensin dexar de llau los totales que la carauterizaben.

L’asturiana Zebra encárgase de la so producción y cuenta con más de 1.000 capítulos dende que RTVE comenzó la so emisión hai agora 3 años.

Na semeya, Cotiello siente les indicaciones del asesor médicu de la serie.

Contador Estadistiques