L'académicu Melendi va encargase del Área d'Informática y Telecomunicaciones na Universidá d'Uviéu

|

El rector de la Universidá d'Uviéu Santiago García Granda fixo público esti xueves los sos seis primeros direutores d'área, pa lo que tuvo en cuenta la paridá, la esperiencia y la diversidá d'estayes de conocencia de los candidatos. L'académicu David Melendi va llevar l'Área d'Informática y Telecomunicaciones.

Con 8 años a los sos costazos dirixendo la informática de la Universidá d'Uviéu y con una vasta conocencia de los grandes sistemes informáticos pola so etapa profesional anterior, Melendi foi escoyíu por García Granda pa llevar l'Área d'Informática y Telecomunicaciones dientro del Vicerrectoráu de Recursos Materiales y Tecnolóxicos que tien a Marta Hernando al frente. Nacíu n'Uviéu nel 1974, ye Doctor pola Universidá d'Uviéu, Inxenieru n'Informática y Inxenieru Téunicu n'Informática de Sistemes, cuenta con una esperiencia amplia y dende'l 1999 ye profesor nel Área d'Inxeniería Telemática del Departamentu d'Informática de la Universidá d'Uviéu, na que permanez na actualidá ocupando una plaza de profesor titular. Nel añu 2013 l'Academia de la Llingua Asturiana nomólu académicu correspondiente.

El restu de nomamientos anunciaos hasta'l momentu por García Granda son Isabel Ruiz de la Peña como encargada del Área d'Espardimientu y Promoción de la Investigación (Vicerrectoráu d'Investigación); María Mitre, del Área de Posgráu y Títulos Propios (Vicerrectoráu d'Organización Académica); Serafín Marcos Costilla, del Área de Coordinación de Ciencies de la Salú (Vicerrectoráu d'Aición Tresversal y Cooperación cola Empresa); Ignacio del Río, del Área de Colexos Mayores y Residencies Universitaries (Vicerrectoráu d'Estudiantes); y María Álvarez Fernández, del Área d'Estensión Universitaria y PUMUO (Vicerrectoráu d'Estensión Universitaria y Proyeición Internacional).

Contador Estadistiques