L'Academia de la Llingua va pidi-y al Gobiernu asturianu que garantice'l derechu de los ciudadanos a rellacionase n'asturianu coles alministraciones

L'Academia de la Llingua Asturiana dio esta mañana una rueda de prensa na que quixo afitar el so paecer énte los acontecimientos de les últimes selmanes, nes que dellos trabayadores de l'alministración autonómica vieron como'l Principáu-yos refugaba escritos y notificaciones internes por tar redactaes n'asturianu. L'ALLA fexo tamién pública una propuesta a la Xunta Xeneral del Principáu d'Asturies pa iguar la situación.

La presidenta de l'Academia de la Llingua Asturiana, Ana Cano, aseguró que la institución quye representa "llamenta, daveres y fondamente, qu'el so llabor tutelar de los derechos llingüísticos tenga que ser una de les sos obligaciones más frecuentes" llamentando que sía l'Alministración asturiana, "xustamente la que que tendría que facer de so la proteición de los nuesos derechos llingüísticos" la que "incumpla gravísimamente esi cometíu al refugar de mou esplícitu l'exerciciu de tales derechos".

Ente les decisiones que llevaron a l'ALLA a marcase sobre esti particular pesaron la non tramitación, por tar los escritos n'asturianu, de la Tesis Doctoral del profesor Faustino Zapico o la denegación de cursar un permisu, pa ser sometíu a pruebes médiques al funcionariu de los Servicios Xurídicos del Principáu Xurde Blanco, unes situaciones "a les qu'hai qu'axuntar agora la non tramitación per parte de la Conseyería d'Educación d'una comisión de serviciu, fecha pol profesor Xosé Nel Comba n'asturianu". Dende l'ALLA califícase esti casu como "inda más sangrín, si ello ye posible, en cuantes que'l mentáu profesor venía faciendo usu d'esti derechu, reconocíu esplícitamente na Llei d'Usu del Asturianu nel so artículu 4, dende l'añu 2004 y ensin nenguna torga". L'academia, que ta convencida de que nesti casu actuose "a mala fe" camienta que "esti facer ye especialmente doliosu en cuantes que'l discursu oficial del Gobiernu del Principáu d'Asturies caltién que la oficialidá nun ye necesaria, porque n'Asturies hai llibertá d'usu llingüísticu acordies cola llei". Pa la institución llingüística "la realidá, ensin embargu, ye mui estremada desque ye'l propiu Gobiernu'l qu'incumple la so obligación de promoción del asturianu y, nel so casu, prohíbelu cenciellamente".

En rempuesta a estes situaciones, l'Academia dio anuncia de que va llevar énte la Xunta Xeneral o, nel so casu, a la Diputación Permanente del parllamentu asturianu, una propuesta na que solicita que les instituciones asturianes d'autogobiernu tengan "la obligación de facer que'l derechu de los ciudadanos asturianos al usu de la llingua asturiana seya, acordies cola llegalidá vixente, plenamente efeutivu". El testu propón que la Xunta Xeneral del Principáu, na so calidá d'órganu históricu de representación de los asturianos, "encamiente al Gobiernu del Principáu que faiga vidable'l derechu de los ciudadanos al emplegu del asturianu nes sos rellaciones coles instituciones asturianes y, nel so momentu, coincidiendo cola reforma del Estatutu d'Autonomía d'Asturies, proponga una definitiva toma de determín con respeutu a les llendes xurídico-oficiales de la so consideración".