L’Academia de la Llingua sofita la manifestación del día 5

L'ALLA y el Conceyu Abiertu Pola Oficialidá dieron esta mañana una rueda de prensa na que la Institución Académica mostró'l so sofitu esplícitu a la movilización del próximu día 5 de payares en defensa de la Oficialidá de la Llingua Asturiana na reforma del estatutu d'Autonomía d'Asturies qu'entama la plataforma Conceyu Abiertu Pola Oficialidá (CAO). La presidenta de l'Academia Ana Cano y Fernando Ornosa en representación del CAO tuvieron un conceyu previu a la comparecencia pública nel que s'informó del trabayu que vien faciendo'l CAO nesto últimos meses. La posicion del CAO na politica llinguistica asturiana foi ún de los temes de la entrevista, y dende'l CAO aclarióse que la plataforma trabaya "Dende Tinamayor al Eo col enfotu de crear el máximu consensu posible alredor de la oficialida del asturianu y del gallego-asturianu nel Navia-Eo" según aclarió Fernando Ornosa, que remachó nunos díes en que la polémica gallega marca l'actualidá de la llingua la idea de que'l CAO defende "qu'Asturies y solo Asturies tien de facer la so política llingüística" y que "ye precisamente por nun facer qu'agora vese qu'otros tan faciendo, por eso, solo la oficialidá ye la solución y la única midida que va pesllar inxerencies esternes"

En cuantes a los aspectos de la manifestación del día 5, que l'ALLA va sofitar oficialmente, presentáronse la llista de personalidaes asturianes que van abrir la marcha. El ciclista Chechu Rubiera, Xose Anton Suarez Puente, médicu del equipu del investigador nel cáncer López Otín, la Decana de Ciencies de la Educación Aquilina Fueyo Gütierrez , les escultores Maite Centol y María Jesus Rodriguez, los periodistes Rosa Viondi (Teleasturias) Sonia Avellaneda (Radio Vetusta) y Luis Ordoñez (La Voz de Asturias), l'autor teatral Maxi Rodríguez, el notariu Luis Posada, la presidenta de l'ALLA Ana Cano, la escritora Marta Mori, Jose Luis San Fabian, profesor de la facultá de Ciencies, l'escritor y articulista Luis Arias Argüelles-Meres, y los profesores de la facultá d'Historia Isabel Torrente y Javier Fernández Conde, son los qu'igüen pel momentu la llista de notables que van encabezar la marcha que va salir a la 1 de la estación de la Renfe d'Uviéu.

Tres de la pancarta d'apertura va dir otra colos representantes de les organizaciones polítiques y sindicales que sofiten la manifestación. Les ausencies más destacaes nella van ser les de la FSA-PSOE y el PP, pero'l panorama sindical va tar representáu na so práctica totalidá, mientres que la organización cuenta cola participación de bien de militantes de los dos partíos a títulu personal na manifestación. L'actu va pesllar con un actu musical pa tolos gustos nel que va sentise al Cuartetu Torner, Anabel Santiago, Mariluz Cristóbal Caunedo y al grupu Skama la Rede.

Otramiente, pa dir caleciendo l'ambiente con vistes a la manifestación, el CAO va organizar esti fin de selmana magüestos populares nel rastru de Xixón y na plaza del Teatru Campoamor d'Uviéu tamién el domingu pela mañana.