L'Academia de la Llingua entregó los sos premios

L'Academia de la llingua Asturiana entregó nel día ayeri los sos premios que quieren reconocer distintos trabayos d'investigación y creación lliteraria, toos ellos rellacionaos col asturianu. Escritores y investigadores como Inaciu Hevia Llavona, Miguel Solís Santos, Xose Nel Riesgo o los creadores del cortu-documental "Suena'l Camín" fueron premiaos na edición d'anguaño..



Nel apartáu de de Recoyida de material toponímico, el premiu de 600 euros foi pa "Toponimia de la parroquia de Gobiendes (Colunga)", realizáu por Inaciu Hevia Llavona y l levó un accésit de 300 euros el trabayu tituláu "Toponimia de les parroquies de Cuadonga, y La Riera, con La Montaña de Cuadonga (Cangues d'Onís)", del que ye autora Conceición Vega Obeso. Otros dos accésit de 150 € fueron pa los trabayos entitulaos "Toponimia d'El Valle (Candamu)", del que son autores el grupu de trabayu Estaferia, y al trabayu "Estudiu de la toponimia del Altu Ayer. Parroquies de Conforcos y L.lamas", del que ye autor Jorge Alberto García Fernández. Quedaron ermos los concursos de Recoyida oral de léxicu asturianu, d'Investigación llingüística y d'Investigación sobre lliteratura asturiana.



Nel apartáu dedicáu pa les creaciones escrites pa la reciella, na categoría de Concursu de Llectures pa Rapazos, el premiu de 600 euros foi ex aequo pa les obres entitulaes "La guaxa", de la que ye autor Miguel Solís Santos, y "Benxamín el perrucuspín", d'Alberto Menéndez García. El Premiu "Llorienzu Novo Mier" de creación lliteraria foi pa Xose Nel Riesgo cola narración titulada "Escrito na ceniza". Quedó ermu'l Concursu de Teatru.



No que cinca al Concursu de Recoyida de Material Lliterario Escrito, Premiu "Federico G.-Fierro Botas", el xuráu decidió da-y un accésit de 300 € al trabayu entituláu "Rimas en astur-leonés de Casimiro Cienfuegos", del que ye autor Rafael Rodríguez Valdés, quedando pela so parte ermu'l Concursu de Recoyida de Material Lliterario Oral. Finalmente el premiu de 1.200 € Concursu de Curtios Cinematográficos foi pa la Pola L.lena, yá que se premió'l trabayu entituláu "Suena'l camín", del que son autores Efrén Álvarez, Laura Pola, Carmen Bernardo, Fernando Farpón y Jorge Fernández. Esti curtiu-documental puede vese n'sección de TV d'Asturies.com nesta dirección.