L’Academia de la Llingua denuncia la poca presencia del asturianu na TPA

La presidenta de l'Academia de la Llingua Asturiana, Ana Cano, afirmó nunes declaraciones daes a conocer ayeri pola axencia Europa Press que la presencia del asturianu na Televisión Autonómica ta "mui alloñada" de los "planteamientos más moderaos que se fexeron nel so momentu". Cano afirmó que la TPA habría emitir a lo menos el 50% de la so programación n'asturianu y ello ensin discriminación de nengún tipu, lo mesmo n'horarios que en temátiques de los programes". La presidenta de l'ALLA pidió que l'asturianu fuera "lingua vehicular nún de los dos espacios informativos diarios de la TPA, el del mediudía o el de la nueche" como "una preba de que la cosa entama a dir con normalidá.

La presidenta venceyó la situación de la llingua na televisión cola que sufre a nivel políticu, y más concretamente cola falta d'oficialidá, un aspectu que, dende'l so puntu de vista, "empobina al idioma al desaniciu".

La presidenta de l'ALLA refirióse a la perda de tresmisión xeneracional de la llingua de padres a fíos como'l mayor problema al que s'enfrenta l'asturianu y aseguró qu'ello podría entornase "de mano cola oficialidá, y dempués con una Llei de Normalización que faiga viable una normalización social real". Ana Cano alvirtió que tola situación xenerada alredor del futuru del asturianu tien esclusivamente una "responsabilidá política" y pidió que se faigan les lleis precises pa que la espresión en llingua asturiana tenga la mesma validez que en castellanu".

Na so entrevista cola axencia de noticies, Cano negó qu'haya conflictu ente la norma académica del asturianu y les sos variedaes dialectales. Cano recordó que "nenguna norma respuende exactamente a lo que se fala na cai en nengún idioma, y eso nun ye problema específicu del asturianu" definiendo la norma asturiana como construyida alredor de la variante central na fonética y la morfoloxía pero que permite, tocante a sintaxis y léxicu, cualquier construcción gramatical o que cualquier palabra asturiana puea formar parte de la llingua estándar". Cano denunció un nuevu problema políticu nesti sentíu en cuantes que "la identificación del falante cola llingua culta soluciónase con una bona escolarización, cola presencia digna de la llingua nos medios de comunicación y con una bona normalización social".



La presidenta de l'ALLA recordó como amás de la oficialidá del asturianu la institución que representa defende igualmente la oficialidá del eonaviegu nos conceyos onde se fala.