L’Academia de la Llingua Asturiana tien abiertu'l plazu de presentación a los sos concursos

L'Academia de la Llingua Asturiana tien abiertu'l plazu pa la presentación d'orixinales a los sos concursos de creación y investigación na so convocatoria 2007, siendo l'últimu día pa la presentación de trabayos en toles estayes el 15 de xineru del 2007.

Les estayes más creatives correspuéndense colos concursos de llectures pa rapazos, el de creación lliteraria "Llorienzu Novo Mier", el concursu de Teatru y el de Curtios Cinematográficos.

Nel casu de les llectures pedagóxiques pa rapazos, el concursu repártese nuna estaya pa trabayos empobinaos a neños de primaria y otra pa los de secundaria, valorándose tamién amás del valir de los testos como preseos pa la enseñanza, les ilustraciones que puean acompañalos. Pela so parte, la convocatoria del "Llorienzu Novo Mier" apauta un mínimu de 50 fueyes d'estensión pa los orixinales, estremando les llinies a doble espaciu con tema llibre. El concursu de creación lliteraria y el de Teatru apauten que cada autor pue mandar más d'una obra, siendo l'almisión de trabayos abierta a cuantos quieran presentase. El primer premiu nestes estayes ye de 600 euros, una cantidá que se dobla nel concursu de creación cinematográfica.

Otramiente, tan tamién abiertes les convocatories de recoyida de material lliterariu oral y de recoyida de material lliterario escrito, presentando esta última la característica de que les compilaciones de testos que se presenten han ser escritos con fecha orixinal anterior a 1970.

Xunto a estos concursos, l'ALLA entama tamién los Concursos d'Investigación, con una estaya pa trabayos de recoyida de material toponímico oral ensin asoleyar previamente y otra pa la recoyida de material léxico asturiano ensin asoleyar, mientres qu'una tercera ta acutada pa trabayos d'investigación llingüística y sociollingüística, pudiendo tratar aspectos xenerales o concretos lo mesmo dende perspectiva diacrónica que sincrónica. P'acabar, una cuarta convocatoria empobínase a trabayos d'investigación sobre lliteratura asturiana oral o escrita, con un llargor máximu de 100 fueyes.