L'academia asoleya un informe sobre la represión del asturianu

L'Academia de la Llingua Asturiana presentó ayeri l'informe "La represión y la non reconocencia de los derechos llingüísticos n'Asturies" 23 páxines d'informe nes que l'academia da un repás críticu a la situación del asturianu, entamando per analizar l'estatus xurídicu de la llingua y pasando darréu a analizar la marxinación que sufre nes estremaes estayes de la sociedá, dende l'alministración y el sistema educativu hasta los medios de comunicación, amás de dellos casos de represión pol usu del idioma nel puestu de trabayu. Denunciando'l peligru de muerte que cuerre la llingua asturiana de siguise como se va agora, l'informe de l'Academia de la Llingua remata diciendo que fai una política llingüística real que se marque plazos na recuperación del idioma y que s'eche'l frenu a la situación d'agora, en que los organismos de l'alministración yá nun ye que tean reducíos a la mínima esprsión, sinon que cenciellamente nun esisten cola desapaición nesta llexislatura de la Oficina de Política Llingüística. L'Academia tamién diz que la "llei d'usu" que yá-y abulta un testu estrenchu de mires, tampoco nun se cumple.Esti documentu, que yá firmen los grupos parllamentarios d'IX y URAS, la Xunta de Personal Docente non Universitario d'Asturies y el Conseyu de la Mocedá d'Asturies, va llevase énte la Unesco, que va unos meses enxertó l'asturianu na llista de llingues en trance de desapaición, al parllamentu européu y a tolos estamentos políticos españoles y asturianos.