L'ablana va a menos

Esti fin de selmana, l'Infiestu celebra otra edición del Festival de l'ablana, ún de los productos más emblemáticos del campu asturianu de va sieglos pero qu'anguaño tien una producción más simbólica qu'otra cosa. La poca rentabilidá de l'ablana asturiana, que nun pue competir col productu catalán nin muncho menos col turcu, ta condergando a esti frutu, que nunca nun llegó a cultivase con métodos modernos, a un progresivu desaniciu. Sacar l'aceite de l'ablana, pa lo que fadría falta una inversión grande en maquinaria, o vender lo poco que se produz d'ello en mercaos de categoría como' de los productos ecolóxicos son de les poques salíes que-y queden a l'ablana de Piloña, últimu conceyu onde esti frutu inda se caltién. Lloñe queda ya'l tiempu en que'l Ferrocarril de Llangréu carretaba cargamentos enteros d'ablana del altu Nalón que-yos dexaben abondes perres a los productores.