La XXXIV Selmana de les Lletres va tar dedicada a Nené Losada Rico

El 29 d’abril va principiar la XXXIV Selmana de les Lletres Asturianes, que nesta ocasión va tar dedicada a Nené Losada Rico, escritora que finó nel 2009 a los 87 años. Cultura va estender esta edición al teatru, la música y la gastronomía.

La obra y la figura de l’autora de Valdés, una de les poetes más reconocíes de la nuesa lliteratura, va ponese en valor con una serie d’actividaes a lo llargo de tola selmana. Nené Losada Rico (Ḷḷuarca, 1921-2009) comenzó a escribir poemes y rellatos tanto en castellanu como n'asturianu occidental, siguiendo pronto la estela del Padre Galo al enfocar les sos creaciones a un tonu popular. Llueu, éstes evolucionaron, tanto na temática como na forma, a espresiones llíriques nueves y a un intimismu mayor. Ente les sos espublizaciones destaquen ‘Cantares valdesanos’ (Llibros del Pexe, 1992), ‘Entre apigarzos’ (Trabe, 1997) y ‘El nome de las cousas’ (Trabe, 2001), amás de les antoloxíes ‘Fueyas que reverdecen’ (Atenéu Obreru de Xixón, colleición ‘Tiempu de cristal’, 2005), ‘Obra poética en castellano’ (coedición de la Fundación Fernández Lema y Trabe qu’incluyía tamién un CD) y el volume ‘Obra completa n’asturianu’ (Trabe, 2011). Coincidiendo cola celebración de la XXXIV Selmana de les Lletres Asturianes va editase un llibru conmemorativu sobre Losada que se va entregar de baldre el Día de les Lletres Asturianes (vienres 4 de mayu) cola merca d’un llibru o discu en cualquier de les llibreríes del país que celebra’l Día del Llibru n’Asturianu.

Ana González, conseyera d’Educación, Cultura y Deporte, anunció nel mes de xunetu, mientres la presentación na Xunta Xeneral de los sos planes pa esta llexislatura, un cambiu de formatu de la Selmana de les Lletres Asturianes al entender que l’actual “quedó superáu”. Esta modificación, al final, va quedar na ampliación del programa d’actividaes a ámbitos nuevos como’l teatru, la música y la gastronomía. Ente lo confirmao hasta’l momentu destaca la celebración d'una gala dedicada a la música y la poesía n'asturianu, que tendrá llugar nel auditoriu del Centru Niemeyer el martes 30 d'abril, y el I Certame de Teatru Escolar en Llingua Asturiana/Gallego-asturiano, yá convocáu, que va rematar con una gala nel Teatru de Llaboral el miércoles 8 de mayu. “La intención ye programar eventos o realizar actuaciones que lleguen a públicos distintos y a tolos tramos d'edá”, espliquen dende la conseyería.