La xusticia afita l'usu compartíu de la sede d'Uviéu ente'l sector criticu del PCA y IX

La xuez titular del Xulgáu númberu 4 d'Uviéu autorizó ayer l'usu compartíu de la sede d'IX na plaza d'América de la capital asturiana. D'esta forma la xusticia afita que lo mesmo IX que'l llamáu "sector críticu" del PCA pueden usar les sos instalaciones. Esta sentencia vien dada porque'l pasáu martes los responsables d'IX decidieron cambiar la pesllera y torgar l'acesu a miembros de PCA, yá q'estos últimos "formen yá parte d'otres formaciones polítiques", en clara referencia al nuevu partíu "Asamblea de Ciudadanos por la Izquierda", encabezáu por los dos ex-conceyales d'IX d'Uviéu. Los miembros del PCA pela so parte denunciaron la situación por allanamientu. L'auto xudicial ordena agora la non restricción d'acceso pa nenguna de les dos partes. Na tarde d'ayer rexistráronse, sigún una denuncia presentada güei, delles agresiones a miembros del PCA.

Una vez conocíu l'auto xudicial, militates d'IX dirixerónse a la sede uvieína, na que taben encerraos dellos miltates del PCA, rexistrándose momentos de tensión qu'acabaron , sigún denunció esta mañana el secretariu xeneral del PCA, Francisco de Asis, n'agresión a dellos de los sos militantes. En concreto'l vicesecretariu de Finances del PCA, Manuel Fraile, y el secretariu del PCA de Llanes, Borja Llorente, tan acabante de presentar una denuncia contra militantes d'IX por agresiones. Ún de los denunciaos ye'l Conseyeru de Xusticia del gobienu asturianu, Francisco García Valledor. Asimesmo 'l periodista Juan Vega tamién foi agredíu resultando con dellos guelpes nel cuerpu y la cara, polo que tuvo que treslladase al hospital. Pela so parte'l coordinador d'IX d'Asturies, Jesús Iglesias, afirmó que "IX nun tien nengún conflictu col PCA, que tien de secretaria xeneral a Noemí Martín, sinón que tien un problema con una serie d'individuos que pretendiendo mantener la so militancia n'IX formalmente, configuraron un proyectu políticu alternativu que se llama Asamblea de Ciudadanos por la Izquierda, y dende la sede y utilizando los medios materiales d'IX fixeron campaña d'esi partíu".