La Xunta y Xeira aclarien les razones poles que nun van asistir a les xornaes de Ribadeo

La selmana pasada la Xunta Pola Defensa de la Llingua y Xeira anunciaron que nun pensaben presentase a les xornaes qu'entamaba la Universidá de Vigo en Ribadeo y nes que va falase sobre la normalización del gallegu y nes que la organización quixo contar con representación asturiana pa que l'alcuentru valiere de puntu de coomunicación colos colectivos y instituciones de de defensa del asturianu y tamién pa falar de la cuestión del Navia-Eo. Anque nun principiu aceptaron el convite, Xeira y la Xunta Pola Defensa de la Llingua acabaron refugándolu, y ello por delles razones qu'esplicaron ayeri les dos organizaciones nuna rueda de prensa conxunta.


Ello ye que la Xunta pola Defensa de la Llingua Asturiana recibió nel so día'l convite dende Vigo pa participar nstes xornaes. En cuantes que la cuestión del Navia-Eo ye un asuntu central de la política llingüística, a la XPDLA paeció-y imprescindible la participación de Xeira, asociación del occidente asturianu que lleva más de quince años defendiendo los derechos del gallego-asturianu. Aceptada con dello de rocea la propuesta de la Xunta, los responsables de dames organizaciones asturianes vieron como "anque na información que del programa de la Escuela se nos diba dando a entrambes organizaciones insistiáse na idea del diálogu y el respetu mutuu… nes declaraciones que foron apaeciendo dende instancies gallegues -y tamién dalgunes asturianes- más paecía que se trataba d'un actu de confirmación de la galleguidá llingüística del Navia-Eo" La celebración d'un amagüestu nel conceyu asturianu de San Tiso d'Abres coincidiendo cola presentación de la polémica candidatura gallego-portuguesa a la UNESCO qu'enxerta l'occidente asturianu como parte del patrimoniu inmaterial gallego-portugués foi ún d'esos puntos nos que les organizaciones asturianes vieron que l'actu de Ribadeo asitiábase nun contestu nel que " La falta d'un marcu llegal que garantice los derechos llingüísticos de tolos falantes d'asturianu y gallego-asturianu y que comprometa al nuestru Gobiernu con una política firme de normalización llingüística ta favoreciendo qu'otres comunidaes y entidaes polítiques ayenes a Asturies quieran facer por nosotros lo qu'equí nun se fai". Xeira y la Xunta aluden a un "contestu políticu onde partíos como ERC o'l BNG valen d'apoyu nos gobiernos del PSOE nel Estáu y en Galicia respectivamente y nel qu'asistimos a situaciones como la presentación d'una propuesta d'ERC nes Cortes españoles pa facer oficial el gallegu nel occidente d'Asturies, l'aprobación d'un Plan de Normalización Llingüística en Galicia que contempla actuaciones nel estremu occidental asturianu o la promoción d'una candidatura na UNESCO onde s'inclúin como parte de la cultura gallego-portuguesa territorios asturianos". Les dos organizaciones sorrayen que "Estes inxerencies n'Asturies tán provocando, ente otres coses, el malestar xeneralizáu de la población y el rechazu de les corporaciones locales del occidente que reclamen n'alcuerdos plenarios que se ponga d'una vez frenu a esta situación"

Con toes estes circunstancies xuntes Xunta y Xeira lleguen a la conclusión de que "vese a les clares que nun se dan les condiciones pa que les nuestres organizaciones puedan participar nos debates en Ribadeo". Tanto la XPDLA como Xeira aclarien que "quixeron siempre asistir y enxamás van negase a dialogar sobre cuestiones llingüístiques, pero non nes circunstancies actuales onde la información per parte de la organización foi deficiente y tolos datos apunten a que la nuestra presencia podría interpretase como un apoyu a un actu propagandísticu galleguista que nun respeta la capacidá de decisión de los asturianos sobre'l futuru de la so llingua y la so identidá".

Na rueda de prensa conxunta que dieron ayeri les dos organizaciones sorrayaron que "la inesistencia n'Asturies d'una política llingüística efectiva y la dexación de responsabilidaes del Gobiernu asturianu ye esmolecedora" y que "por eso les nuestres dos organizaciones coinciden en que la oficialidá ye l'únicu marcu llegal que pondría unes bases clares pa qu'estes inxerencies nun se dieren"