La Xunta y SUATEA piden l’aplicación de la sentencia del TSXA

La Xunta pola Defensa de la Llingua Asturiana y SUATEA vienen d’amosar el so contentu  pola sentencia de la Sala de lo Contencioso Alministrativu del TSXA y esixen l’aplicación “inmediata” de la sentencia.

La sentencia de la Sala de lo Contencioso Alministrativu del Tribunal Superior de Xusticia d'Asturies, que declara nulu «por ser contrariu a derechu», l'artículu de la resolución del 16 de mayu del 2008 onde la Conseyería d'Educación y Ciencia establecía un númberu mínimu de 8 alumnos pa facer  grupos na asignatura de Llingua Asturiana na Educación Secundaria; foi aplaudida pola XPDLLA y SUATEA.

“Queremos treslladar la norabona a tola xente que llevó alantre esta reclamación fundamental pa los derechos de los estudiantes y pal cumplimientu de les lleis vixentes”, señaló’l colectivu prollingua que llama a que la materia tenga presencia “en tolos tramos educativos sin que l’Alministración pueda hurtar esi derechu al traviés de les diferentes maniobres a les que nos tien avezaos”.

Aplicación inmediata
Amás, tanto’l sindicatu d’enseñanza SUATEA como la Xunta pola Defensa de la Llingua Asturiana, llamen a l’aplicación inmediata de la sentencia. El colectivu en defensa de la llingua señaló qu’asina s’entamaría’l “camín de la normalización llingüística y el cumplimientu de la llei nel sistema educativu”.

D’otra miente, SUATEA tamién esixe l’aplicación inmediata pa que “que l’alumnáu de Secundaria y Bachilleratu qu’a primeros d’esti cursu solicitó recibir clases de Llingua y nun s’atendió la so pitición esviándolo a grupos d’otres optatives, seya atendío acordies cola so elección voluntaria orixinal”.

Tamién n’Educación Infantil
SUATEA llama amás a “l’atención inmediata de tol alumnáu d’Educación Infantil que venía recibiendo clases de Llingua o Gallego-Asturiano y esti añu se ta denegando’l so derechu a recibiles” y a “la obligatoriedá de la ufierta voluntaria de conteníos de Llingua y Gallego-Asturiano en tolos centros d’Educación Infantil”.