La Xunta Xeneral valta la proposición del PP de crear materies pa competir col asturianu

Los votos de la FSA, Podemos y Izquierda Xunida valtaron la propuesta del PP de crear asignatures pal bloque de llibre configuración autonómica pa competir cola de Llingua Asturiana. Foro astúvose y Ciudadanos votó a favor, proponiendo meter el segundu idioma estranxeru nel d'específiques.

Pese a que'l popular David González Medina trató d'amazcaritar la proposición non de llei del so partíu cola defensa "de la llibre eleición de les families y de matrícula", lo cierto ye que la intención de la so formación de "confrontar y enfrentar", como señaló Concha Masa, llevó a los trés grupos d'izquierda a valtala. "Quieren destruyir tolo que güela a diversidá", añadió Lucía Montejo, que calificó la propuesta popular de "xenófoba y racista", lo que xeneró la protesta de los diputaos del PP.

Nun foi la única polémica al rodiu l'idioma, yá que n'otra proposición non de llei presentada pol PP pa facer cambios na cartelería depués de que pasaren 17 meses de l'aprobación de catálogu nuevu de la Rede de Carreteres del Principáu, abrióse l'alderique cuando'l grupu parllamentariu popular refugó la enmienda de Podemos pa qu'incluyera la toponimia oficial. "Ponen la coletilla de introducir en la nueva cartelería la toponimia en asturiano de los lugares que atraviesan las carreteras de la nueva Red del Principado, pero es que ya hay una ley que marca estos asuntos y la hay que cumplir", dixo Carmen Pérez García de la Mata.

Héctor Piernavieja, pela so parte, llamó a respetar la llegalidá, nomando la Llei d'Usu y l'Estatutu, y acusó al PP de tener "alerxa a la cultura tradicional asturiana".