La Xunta Xeneral suprime'l Conseyu Económicu y Social

Colos votos en contra de la FSA y IX. El Gobiernu tien seis meses pa crear ún nuevu ensin retribuciones pa los sos miembros.

La Llei de Supresión del Conseyu Económicu y Social (CES), presentada pol PP, salió alantre col sofitu de Podemos, Foro y Ciudadanos. D'esta forma desaníciase esti organismu consultivu creáu nel 1988 nel que participa la patronal, los sindicatos mayoritarios, la Universidá d'Uviéu, la Federación Asturiana de Conceyos, la Fundación para el Fomento de la Economía Social y el Gobiernu.

L'argumentu principal pol que se da esti pasu ye'l costu altu del mesmu, unos 800.000 euros añales. Mientres, FSA y IX criticaron qu'esta decisión provoca un amenorgamientu de la participación ciudadana.

La norma obliga agora al Gobiernu a crear un conseyu nuevu nun plazu de seis meses que permita la participación institucional de los axentes económicos y sociales, pero nel que lo sos miembros nun reciban retribución nenguna.