La Xunta Xeneral reclama al gobiernu español el cumplimientu del Plan del Carbón

La Xunta Xeneral vien de reclamar esti xueves al gobiernu español, nuna sesión plenaria col conflictu de la minería como únicu asuntu, el cumplimientu de los alcuerdos adoptaos y la suspensión de los retayos al sector.

Asina, a lo llargo de la mañana se han debatiéronse y aprobáronse dos mociones presentaes por IU y por Foro Asturias en defensa de les ayudes al sector, anque les mesmes tuvieren el votu en contra de los diputaos del PP.
 
Na primer moción pídese al Gobiernu español que cumpla lo pautao y garantice’l sofitu presupuestariu pa cumplir colos alcuerdos reflexaos nel Plan del carbón; afálase amás al Gobiernu a impulsar los mecanismos necesarios pa trabayar na negociación d’un nuevu plan del carbón asina como defender énte la UE el futuru de la minería más allá de 2018.
 
Na segunda moción aprobada solicítase dotar al Instituto para la Restructuración de la Minería del carbón y Desarrollo Alternativo de las Comarcas Mineras de les partíes necesaries p’atender los compromisos alquiríos, asina como’l mantenimientu del empléu mineru y por tanto de les ayudes a les empreses.
 
Compromisu por Asturies amuesa'l so refugu radical a los retayos

Pela so parte Yolanda Huergo, vocera de la executiva nacional de Compromisu por Asturies bien d’amosar el so refugu radical a les midíes anunciaes ayeri por Mariano Rajoy. Compromisu califica de “inadmitibles” los retayos económicos, sociales y democráticos.

Dende Compromisu por Asturies anuncien una oposición radical a toles midíes anunciaes pol gobiernu de Rajoy, que conderguen por suponer “la perpetuación y l'agravamientu de la crisis, yá que sigue la entrega paulatina de retayos que castiguen duramente al Estáu de Bienestar”. La organización asturianista afitó que “llueñe d'una fuxida p’alantre -tal que quier presentar el PP- ésta ye una posición ideolóxica clara, qu'atenta contra les prestaciones sociales, asitiándoles nuna inxusta contraposición cola salida a la crisis”.