La Xunta xeneral estremóse en dos bandos

El parlamentu asturianu echó p'atrás les 74 propuestes del PP y aprebó les 16 que presentaren conxuntamente IX-BPA y el grupu socialista nel debate sobre l'estáu d'Asturies, qu'acabó esta tarde. Les obres financiaes con cargu a los fondos mineros y la política fiscal del Gobiernu central y asturianu marcaron otra vegada'l debate . El PP presentó propuestes pa que l'executivu asturianu cumpliere toles obre comprometíes nel plan de la minería y esixó la celebración d'un debate monográficu sobre los fondos mineros.

En tema fiscal, el PP, cumpliendo colo que manda la so llinia política, reclamó la retirada dafechu del impuestu de socesiones y pidió que'l Principáu retirare'l recursu que tien puestu contra la llei de déficit cero. Sobre esta idega, el presidente Areces dixo qu'elli diba defender la competencia del gobiernu asturianu pa poder metese en delda, y remachó-yos a los diputaos del PP que que pidir un debate sobre los fondos mineros yera una muestra de la "impotencia" del PP

Ente les 74 propuestes del PP hubo una enforma chocante, y ye que'l PP pidió que el 0,7 por cientu del presupuestu del Principáu s'empobinare a cooperación. El debate tuvo bien de frases pa la galería d'una parte y d'otra. El popular Ovidio Sánchez dixo que "Areces quixo más xuntase colos comunistes, que ficieron polítiques que nun resultaron en nengún llugar del mundu" y alvirtió que "diba ser un peligru pal país que prosperasen delles de les tesis nacionalistes que defende'l PSOE" . Areces retrucó-y a Sánchez cuando esti-y pidiere un debate sobre los fondos mineros que "en cuenta de salir con argumentos y con datos, como ye un indocumentáu que nun trai nin un papel, va y pide otru debate porque conozse que nun puede retrucar a datos concretos". Por alusiones, el portavoz d'IX Aurelio Martín, con muncha más retranca que Diana Camafeita, esplicó-y al grupu del PP que votaben a la escontra de toles sos propuestes "pa nun contaminales con votos comunistes"