La Xunta tien mieu de que l'asturianu desapaeza nos estatutos de la Universidá

La Xunta Moza, estaya xuvenil de la Xunta Pola Defensa de la Llingua, presentó ayeri, col sofitu de dellos conceyos de la mocedá d'Asturies, ente los que tan el d'Uviéu y el d'Asturies, una campaña de recoyida de firmes en rellación a la situación de la llingua asturiana na Universidá asturiana, col oxetu de forzar la declaración de la titulación en filoloxía asturiana, que yá va torgando tres veces Madrid el Conseyu d'Universidaes. A últimos del añu pasáu la Xunta Moza tuvo una entrevista col rector Juan Vázquez na que se faló sobre esta titulación y sobre les posibilidaes de normalización llingüística na Universidá. D'aquella xunta, que los representantes de la Xunta calificaron de "decepcionante" nun salió compromisu en firme negún por sacar alantre la titulación, que sigue atrancada. Esta campaña de firmes vien a coincidir nel tiempu con otru procesu que pue afectar a la situación de la llingua na Universidá, como ye'l procesu de redacción de nuevos estatutos de la Universidá. La LLei d'Universidaes que s'aprebó l'añu pasáu obliga a toles universidaes del estáu a adaptar los estatutos a la lletra del testu xurídicu nuevu. Ye por ello que na Universidá d'Uviéu esiste una comisión encargada del procesu de redacción d'estatutos nuevos, presidida pol caderalgu de derechu Ramón Punset y na qu'hai representación de profesores, alumnos y personal alministrativu. Según pudo saber la Xunta, hai munches posibilidaes de que la redacción nueva de los estatutos esborrie toles referencies qu'hai agora a llingua y cultura asturianes, en cuantes que'l presidente de la comisión redactora parez tener una una visión abondo restrictiva de la llei d'usu y del articulu 4 del estatutu d'autonomía. Al respective d'esti asuntu, la Xunta fizo una propuesta de redacción a la Universidá colo que-y abulta que tendríen de dicir sobre llingua asturiana los estatutos de la másima institución académica del país.

Contador Estadistiques