La Xunta tamién se quexa pol papel del asturianu na selección de personal pa la TV

Dempués de la reacción del colectivu "Periodistes pol Asturianu" contra les declaraciones del director del énte de comunicación del Principáu Jose Ramón Pérez Ornia, nes que dicía que l'asturianu diba contar como un conocimientu cultural más nes prebes d'accesu a la TV autonómica, la Xunta Pola Defensa de la Llingua emitió otru comunicáu de prensa espresando la so "indignación" énte'l fechu de qu'al asturianu se-y dea'l mesmu nivel qu'a una llingua estraxera cuando ún de los oxetivos colos que se creó l'ente de comunicación foi precisamente'l de la dignificación y promoción del asturianu.

Pa la Xunta les declaraciones d'Ornia "entamen a confirmar les peores provisiones" sobre'l papel que-y va tocar al asturianu nel mediu públicu de comunicación, un papel que paez que va ser "folclóricu y marxinal", al empar que remembren que la organización presentare nel so día un total de más de 20.000 firmes pidiendo una canal de TV autonómica n'asturianu dafechu, unes firmes que dicen que'l Gobiernu asturianu "ignora".