La Xunta presentó la Ponencia Abierta

La Xunta Pola Defensa de la Llingua Asturiana presentó la selmana pasada nel Auditoriu Príncipe Felipe d'Uviéu el documentu final de la "Ponencia Abierta" un testu que quier ser común denominador y base de les reivindicaciones en materia llingüística que se faigan d'equí en p'alantre. La Xunta diz que la Ponencia quier partir d'un diagnósticu fríu, realista y radicalmente comprometíu de la situación na que sobrevive la llingua asturiana nun momentu como’l presente, nel qu’aguanten con una intensidá desconocida dende hai años los ataques en contra de los pocos avances sociales qu’algamó la nuestra llingua. A la fin, firmaron el testu más d'un cientu d'organizaciones, dende polítiques y sindicales hasta culturales y
sociales, incluyendo sigles como les de CCOO, Suatea, IU, URAS, Andecha Astur, IAS o el PAS.



La Xunta
presentó nel mesmu actu la campaña "SOS Asturian Language" la primer campaña que va facer en base a les propuestes d'actuación qu'espeya la Ponencia. "SOS Asturian Language" preséntase como una campaña que busca la participación activa de toles persones y entidaes comprometíes pola defensa de la llingua asturiana. Quien quiera xuntase a la campaña nun tendrá namás que facer que llantar un logotipu col lema de la mesma nel so web, na so empresa o en cualquier productu qu'estime conveniente qu'apaeza'l mensaxe. D'esta manera, por poner un casu, si la persona que soscribe la campaña tien una páxina web, pue comprometese a poner un banner de la campaña, si el soscribiente ye músicu, podría poner el logotipu "SOS Asturian Language" nos discos que grabe etc. L'oxetivu de la campaña nun ye otru qu'esparder y dar a conocer fuera y dientro d'Asturies el conflictu llingüísticu.

Contador Estadistiques