La Xunta pola Defensa de la Llingua quier que la RTPA ‘asturianice’ les sos emisiones

Esta selmana va aprobase la segunda llei de reforma del sector públicu que va afectar sobremanera a la RTPA. La XDLA cree que tien que valir pa recoyer el papel fundamental de la televisión nel procesu de normalización social del idioma.

L'actual llei señala ente los oxetivos de la Radio Televisión del Principáu d’Asturies la promoción de la cultura y l'educación, emprestando especial atención a la protección, promoción y esparcimientu de la llingua asturiana. A pesar d'ello esa protección nun llegó a más d'un 5% de les emisiones de la TPA, y tan solo un 2% en RPA, según recuerda la Xunta pola Defensa del Asturianu. Motivos polos que la organización pide que s'aproveche esta reforma pa reforzar el protagonismu de la llingua na programación y asina fortalecer l’efectu normalizador.

La XDLA destaca la importancia d'una televisión autonómica como instrumentu d'integración social, refuerzu identitario y normalización llingüística. Señala que los programes n’asturianu atópense ente los más vistos de la cadena, y son los únicos que se caltienen percima d'un 10% del 'share' nun contestu nel que los datos d'audiencia de la cadena baxen mes a mes situandose a menos del 5%. Espacios como Sones, Día de Mercáu o La Bolera “dexen ver que l’usu del idioma propiu ye’l puntu d’enganche ente los ciudadanos y la so televisión”. Sicasí, llamenten qu'anguaño nun esista continuidá na programación n'asturianu y qu'haya díes de la selmana na qu'esta suma por completu. Amás del vetu a la llingua nos espacios informativos, la XDLA considera especialmente grave l'ausencia de programación infantil n'asturianu.

Nun comunicáu, piden “al Gobiernu d’Asturies, a los partíos con representación parllamentaria y a toles entidaes comprometíes col idioma que defendan que la llei nueva dexe claru’l papel del mediu na promoción del idioma y de la cultura asturiana”. Ente otres midíes la Xunta pide qu'unu de los dos canales de TPA (A7 y A8) emítase integramente n’asturianu, y ve necesariu tamién la creación d’un Conseyu Llingüísticu formáu por profesionales y encargáu de velar poles emisiones. Ven les midíes como daqué necesariu p'asegurar el futuru de la cadena y la so aceptación social. “Nun queremos qu'a RTPA-y pueda pasar lo qu'a Canal 9”, sentencien na so comunicáu.