La Xunta Pola Defensa de la Llingua píde-y a Gabino de Lorenzo que resuelva les sos “contradicciones” sobre l’asturianu

La organización cívica Xunta Pola Defensa de la Llingua emitió ayeri un comunicáu en que valora los últimos xestos a favor de la llingua asturianafechos dende'l Partíu Popular . Ente estos xestos rescamplen pa la Xunta'l votu a favor de la oficialidá nes mociones presentaes nos Conceyos de Siero, Villaviciosa y Samartín del Rei Aurelio. La organización contrasta estos posicionamientos coles "decepcionantes" declaraciones del alcalde d'Uviéu, Gabino de Lorenzo, nes que se declara a favor del asturianu pero refuga la cooficialidá.

La Xunta, qu'entiende que'l rexidor uviéin quier tar "en misa y repicando" esplica como De Lorenzo, con reconocer "que l'asturianu pue morrer en cuestión de dos xeneraciones y qu'hai qu'echar una mano p'ayudalu a sobrevivir" diz al empar que con ello nun quier sofitar la "cooficialidá" . La Xunta píde-y al alcalde "ser consecuente con fechos" en cuantes que "dempués de tantos años de mandatu la llingua nun se ve en nengún sitiu de la ciudá, nin nos lletreros de carretera, nin nos nomes de les cais o zones nueves urbanizaes, nin na propaganda, nin na documentación institucional".

La organización cívica afirma que "nun pue haber recuperación de la llingua ensin equiparación llegal" y recuerda como "en toles comunidaes tolos partíos apoyaron la oficialidá de les sos llingües". Garrando la palabra del alcalde d'Uviéu, qu'afirmó que "l'amor pol asturianu ta perriba d'ideoloxíes" la Xunta recuerda qu'ello demostrose en Galicia, nel País Vascu, en Navarra, nes Baleares, en Cataluña o en Valencia pa declarar cooficiales les sos llingües, entrugándose por qué ello nun ye posible n'Asturies.

Les declaraciones de De Lorenzo faen camentar a la Xunta que "les cúpules del Partíu Popular y la FSA paez que van de la mano nesti asuntu" alvirtiéndo-yos a dambes fuerces que ye preciso "asumir que nun se pue defender l'asturianu al tiempu que se niega que los usuarios d'esa llingua tengan los mesmos derechos que los usuarios del castellanu" porque "Nun hai más imposición que la que tamos sufriendo los que queremos vivir falando n'asturianu". Pa la Xunta la oficialidá nun ye otro qu'una garantía de derechos ciudadanos qu'ha acompañase "d'una política decidida de normalización llingüística" mientres que "lo demás son bones palabres, fumu, fabaraca".