La Xunta pola Defensa de la Llingua echa contra'l Gobiernu pol procesu de la TV asturiana

Dempués de les durísimes crítiques de l'Academia de la Llingua y Periodistes pol Asturianu, la Xunta pola Defensa tamién emitió un comunicáu criticando'l procesu pol que se van escoyer los profesionales que van responsabilizase de les emisiones del Ente autonómicu de comunicación.

La Xunta céntrase na non valoración del conocimientu del asturianu nes prebes d'almisión como elementu de crítica. Al enender de la Xunta, ello, va contra la Llei de 17 de marzu del 2004 pola que se manda'l funcionamientu de la canal autonómica de TV. Pa la Xunta, el que se-y niegue per esta vía un papel dignu a la llingua asturiana nos medios de comunicación públicos supón igualmente una violación del Estatutu d'Autonomía y de la Llei de Normalización, amás d'una demostración clara de que'l plan de Normalización Social del asturianu ye "papel moyao".

Pa la organización de defensa del asturianu, la entrada en serviciu del Ente va suponer "un fechu ensin precedentes" en cuantes que toles demás televisione autonómiques de comunidaes con llingua propia nacieron precisamente col oxetivu principal de dignificar esos idiomes. Por too ello, pa la Xunta, el gobiernu de coalición PSOE-IX-Ba "agrede y marxina" la llingua asturiana al "negá-yos a los falantes d'asturianu'l derechu accederr a una programación d'información y entretenimientu n'asturianu".