La Xunta Pola Defensa de la Llingua diz que la TV autonómica ye "un apueste pola muerte del asturianu"

La Xunta Pola Defensa de la Llingua denuncia la marxinalidá del asturianu nes emisiones de la RTPA énte la entrada en serviciu del Énte Públicu de Comunicación, prevista pa esti vienres.

Pa la organización de defensa del asturianu, la llegada de les emisiones convencionales de la RTPA supón "ún pasu más nel procesu de substitución y desaniciu de la llingua asturiana". El fechu de que la gran mayoría de les emisiones de la RTPA vayan ser en castellanu valórase dende la Xunta como "inalmisible" faciendo la organización agraviu comparativu con otres comunidaes dotaes de TV propia onde "los medios de comunicación públicos audiovisuales funcionen como canales indispensables de normalización social de llingües que tan amenazaes" entendiendo la Xunta que, amás de la oxetividá y imparcialidá nes informaciones el principiu fundamental d'un énte públicu p'Asturies ha ser el de la promoción y protección de la Llingua.

Pa la Xunta quitá-y esta función a la llingua asturiana ye "imponer el castellanu nún ámbitu más de nueva creación" y un "apueste pola muerte segura del nuestru idioma", denunciando la Xunta la esistencia d'encuestes sociollingüístiques nes que la población asturiana amuésase partidaria de qu'esistan emisores y medios n'asturianu. P'acabar, la Xunta acusa al Gobiernu asturianu d'actuar "a espaldes de la Constitución, l'Estatutu d'Autonomía y la Llei d'Usu no tocante a protección de la diversidá llingüística y accesu del asturianu a los medios de comunicación".