La Xunta pola Defensa de la Llingua denuncia que Riopedre quier quitá-y categoría al asturianu na Universidá

La Xunta pola Defensa de la Llingua Asturiana emitió ayeri un comunicáu de prensa en que condena les declaraciones del Conseyeru d'Educación José Luís Iglesias Riopedre na so comparecencia na Xunta Xeneral, onde afirmó que la intención del so gobiernu ye que la Filoloxía Asturiana quede reducida a "una titulación non de grau inscrita n'otres de llingües modernes".

La xunta recuerda que nel añu 1998 "la Facultá de Filoloxía en primer términu y la Universidá d'Uviéu depués aprebaron la creación de una nueva llicenciatura de Filoloxía Asturiana" y que "la puesta en marcha d'esta llicenciatura viose dende entós paralizada en Madrid pol Conseyu d'Universidaes nuna acción ensin precendente nun organismu de calter políticu dedicáu a llabores de xestión institucional".

"La entrada en vigor del nuevu marcu universitariu européu obliga a reorganizar la ufierta de les titulaciones de filoloxía pa la so homologación nel ámbitu comunitariu", según recuerda la organización, que llamenta que'l resultáu d'esa reorganización d'estudios "nun se conoz entá, polo que les declaraciones del señor Riopedre demuestren que'l gobiernu asturianu participa y actúa en contra de la puesta en marcha d'una titulación de Filoloxía Asturiana" lo que califica de "prueba de la voluntá enfermiza del Gobiernu asturianu d'impedir cualquier avance na dignificación de la llingua asturiana, prohibiendo incluso'l so estudiu en condiciones de normalidá".

Pa la Xunta "Riopedre miente cuando afirma que'l so gobiernu trabaya pa que l'asturianu pueda llegar a la institución académica" y ello porque "la llingua asturiana yá ta presente na Universidá d'Uviéu con dos titulaciones propies d'Espertu y Especialista en Filoloxía Asturiana" sorrayando "la gran demanda qu'acompaña a los estudios de llingua asturiana esistentes angüañu na Universidá d'Uviéu y que supera a la existente na gran mayoría d'especialidaes de filoloxía" y asegura que "nun ye aceptable nenguna propuesta que nun pase pola equiparación de los estudios d'asturianu.