La Xunta Pola Defensa de la Llingua condena les declaraciones sobre l’asturianu de los líderes de la FSA-PSOE

La organización cívica Xunta Pola Defensa de la Llingua salió al pasu de les declaraciones a estremaos medios de comunicación del presidente asturianu Vicente Álvarez Areces y del Secretariu Xeneral de la FSA Javier Fernández nes qu'afirmaben que la oficialidá del asturianu supondría un réxime d'imposición d'esta llingua y que'l PSOE fuere la fuerza que más fexo pol asturianu. La Xunta denuncia qu'estos dos políticos, que son tamién cabeces de llista de la FSA - PSOE nes próximes elecciones "siguen na so particular escapada hacia les postures más acérrimes en cuantes a la cuestión llingüística".

Dende la Xunta afirmase que "Nun s'entiende que los cabezaleros máximos del partíu socialista n'Asturies se definan como protectores de la llingua al tiempu que rellacionen oficialidá con imposición, en contradicción coles tesis qu'esi mesmu partíu defende nos demás territorios billingües del estáu". La organización cívica persabe que "Fernández y Areces tienen que saber de sobra que nun ye posible garantizar la sobrevivencia d'una llingua si nun tien validez xurídica y s'iguala en derechos a les otres" y afirmen que'l problema de la FSA "ye que la so situación ye incómoda" . en cuantes que "defenden esactamente lo contrario que defenden n'otres comunidaes y eso la xente sábelo". La Xunta Pola Defensa de la Llingua recuerda nel so comunicáu la moción sobre reconocimientu de la diversidá llingüística nel estáu y los beneficios del réxime de cooficialidá de les llingües que s'aprobare en congresu l'añu pasáu y que presentare'l mesmu PSOE pa rescamplar les contradicciones de los socialistes asturianos.

La organización de defensa de la llingua "N'ast" tamién condenó les declaraciones de Javier Fernández, al qu'acusó de "engañar al pueblu asturianu " al rellacionar la oficialidá de la llingua asturiana con una supuesta imposición del asturianu a la población" porque "La única llingua que s´impón n´Asturies ye la llingua española".