La Xunta pola Defensa de la Llingua Asturiana denuncia la “hipocresía” del Gobiernu asturianu

La organización cívica Xunta pola Defensa de la Llingua Asturiana denuncia, nun comunicáu unviáu a los medios, lo que califica de "cinismu" por parte del Gobiernu asturianu, dempués de que los representantes del executivu asturianu nel Comité de les Rexones de la UE votaren la selmana pasada al favor del reconocimientu del derechu al usu de gallegu, catalán y euskera nel Parllamentu Européu, una actitú que pa la Xunta rescampla énte la oposición a la oficialidá del asturianu n'Asturies que manifiesta la FSA-PSOE, principal fuerza presente nel Gobiernu asturianu.

No que se califica de "exerciciu d'hipocresía vergonzosu" la Xunta diz que "los representantes institucionales d'Asturies pretenden dar lleciones sobre defensa de la diversidá llingüística nel Comité Européu de les Rexones al tiempu que n'Asturies mantienen una política activa de substitución llingüística y marxinación de la llingua asturiana". La Xunta pola Defensa de la Llingua Asturiana píde-y al Gobiernu asturianu "que desplique porqué n'Europa defende'l derechu al usu del gallegu, catalán y euskera, mientres que n'Asturies defende, consiente, avala y apoya qu'a los asturianos y asturianes se nos niegue de contino'l derechu a usar l'asturianu".

D'otra manera, la organización de defensa del asturianu unvió esti vienres a la so tradicional representante pública "la pita" a la inauguración d'un centru de salú en Llugones al qu'asistía'l xefe del executivu asturianu Vicente Álvarez Areces, que refugó dar el discursu que tenía preparáu énte la presencia de los militantes asturianistes. Efectivos de la Policía Nacional retuvieron cerca d'una hora a la pita y los sos acompañantes, dalgo que dende la Xunta vese como "una actuación claramente escesiva énte una protesta ciudadana, respetuosa y estríctamente democrática".