La Xunta pola Defensa de la Llingua Asturiana algama'l II Premiu Timón de Cultura Asturiana de L'Arribada

El xuráu del Premiu Timón de Cultura Asturiana decidió entregar el gallardón del 2014 a la Xunta pola Defensa de la Llingua Asturiana (XDLA). L'Arribada premia asina la trayeutoria de la organización nos sos 30 años de llucha.

José Rogelio Álvarez Hevia, Xicu Xabel Díaz Yepes, Daniel García de la Cuesta, Aurora García Rivas y Humberto Gonzali, ésti últimu como presidente del xuráu, destacaron “el trabayu de l’asociación premiada na defensa de la llingua asturiana y de los derechos llingüísticos de los ciudadanos d'Asturies”. “Dende 1984 la Xunta pola Defensa de la Llingua Asturiana vien entamando de continuo múltiples iniciatives, empobinaes a la dignificación del asturianu y a la so normalización social nes alministraciones públiques, na enseñanza, nos medios de comunicación, na empresa privada y n'otros munchos ámbitos de la nuesa sociedá”, emponderaron.

D’esta forma, la organización cívica asocede nel palmarés del gallardón a l’Ensame Sidreru, asociación cultural editora de la revista La Sidra. El restu de candidatos d’esta segunda edición del premiu que reconoz a aquellos coleutivos que tienen como fin la conservación y promoción de la identidá cultural del país y qu’empleguen la llingua asturiana nes sos actividaes, foron la Sociedad Humanitarios de San Martín, la Fundación Belenos, l’Asociación Cultural San Tirso del Eo y la Sociedad Popular y Cultural La Regalina. Como recompensa, la XDLA va recibir una obra del escultor y ceramista xixonés Jesús Castañón el 27 de setiembre mientres La Vagamar, l’actividá setembrina de l’Asociación Cultural L’Arribada.

Otra manera, el 12 d'abril  va aconceyar el xuráu del V Premiu Timón p’autores asturianos en llingua castellana –pese a que nun primer momentu'l fallu taba previstu pa esti mesmu sábadu–, al qu’aspiren escritores nacíos nel 1964 y años anteriores, pa decidir el merecedor del gallardón. Los nominaos nesta ocasión son Fulgencio Argüelles, Tino Pertierra, Carmen Ruiz-Tilve, Pepe Monteserín, José María Ruilópez, Aurelio González Ovies, Alejandro M. Gallo, Diego Carcedo, Ángeles Caso, Pedro de Silva, Paco Ignacio Taibo II  y Luis Arias Argüelles-Meres. Mentes, el xuráu del VIII Premiu Timón p'autores n'asturianu y eonaviego va reunise finalmente'l 17 de mayu. A ésti gallardón aspiren Lurdes Álvarez, Esther Prieto, Xosé Bolado, Ignaciu Llope, Esther García López y Ánxel Álvarez Llano.