La Xunta pieslla'l cartel del Conciertu pola Oficialidá

El día ocho de mayu celébrase la edición d'aguaño del Conciertu pola Oficialidá qu'entama la Xunta pola Defensa de la Llingua Asturiana y col que collabora Asturies.com.

Pa esti añu'l Conciertu pola Oficialidá viaxa y vuelve a Xixón, ciudá que va da-y agospiu a esta nueche de música y reivindicación. El llugar escoyíu pa ello ye'l Muséu Pueblu d'Asturies, onde yá se fexo esti conciertu en setiembre del añu 2.000, y onde va llantáse un carpa pa evitar que la lluvia pudiere estropiar la cita. El cartel de bandes que van tocar, como siempre de forma desinteresada, entama colos mierenses "Skanda", conxuntu de rock-folk de la cuenca que yá tien dos discos nel mercáu y que ta grabando estos díes el so tercer trabayu discográficu. El rock tamién va ser protagonista con una banda de Xixón, "Skontra", representantes del nuevu rock n'asturianu que participaron nel compilatoriu "Rock'n'Llingua" discu nel que contaron cola collaboración de dellos miembros de "Dixebra". Los avilesinos, como nun podía ser d'otra manera, tamién van tar tamién nesti conciertu.

Del folk van tocar dos grupos d'estilu asemeyáu colos que queda bien claro que ta asegurada la posibilidá d'echar un baille. Los encargaos d'ello van ser "La bandina" de Santi Caleya y compañía y "Los Ciquitrinos" cola so estrella Rubén Arias.

Les entraes pal conciertu yá se vienden en chigres y establecimientos collaboradores de toa Asturies. El Baruku y Café Triskel de Xixón, Chigre El Naranco, Llibrería Paraxuga y Café Isla de Cuba d'Uviéu, El Cafetón n'Avilés, La Buraka en Mieres, La Xarrina de la Pola L.lena, Abre Cesar de la Pola Siero, El Llar de Keko en Llangréu, Ochobre en L'Entregu, El Chigre Juan en Cangas del Narcea y La Gueta en Carreño. El preciu ye de dos euros pa la entrada anticipada y de trés mercándola na puerte del conciertu.

Nos díes qu'entren vamos siguir dando detalles d'esti conciertu, anque de momentu yá ta disponible'l cartel que podéis ver calcando equí.