La Xunta pidió la TV n’Asturianu na escalerona de Xixón

La Xunta Pola Defensa de la llingua Asturiana llevó alantre güei na Escalerona de Xixón una concentración de protesta que s'enxerta na campaña reivindicativa de la organización, qu'intenta forzar a la directiva del Ente autonómicu de Comunicación a da-y una presencia digna a la llingua asturiana nes emisiones de la TV pública autonómica, que van entamar en prebes ya en setiembre y que va tar emitiendo con normalidá pa la parte d'abril del 2006, acordies coles previsiones de la mesma directiva.

La concentración produzse na mesma selmana en que representantes de la Xunta Pola Defensa de la llingua Asturiana tuvieon una entrevista con José Ramón Pérez Ornia, director del Ente de comunicación. Anque'l másimu responsable del Ente y el so equipu directivu se mostraron dialogantes y abiertos a escuchar les reclamaciones de la Xunta, la organización de defensa del idioma ye pesimista en cuantes que l'alcuentru valió pa constyatar que la llingua nun ye una prioridá nes previsiones del equipu directivu del Ente y qu'esti nun cuenta nin se plantega contar con nenguna estructura interna nin mecanismu esternu de normalización llingüística que planifique la presencia del asturianu. La Xunta va siguir coles sos movilizaciones y presionando a tolos niveles pa forzar un mayor compromisu col asturianu de los responsables del Ente.