La Xunta persigue a Areces

El presidente asturianu va fartucase esti añu de tener enfrente les pancartes de la Xunta Pola Defensa de la Llingua Asturiana, que ta cumpliendo, como prometiere, con sacar alantre un veranu caliente de movilizaciones en protesta polo que la organización cultural considera que ye una política d'estociniu premeditáu del idioma asturianu. La inauguración de les obres pa la carretera nueva que xunte Columbiel.lo col conceyu de La Pola L.lena, que lleva dos años con un pasu provisional depués de qu'una tromba d'agua llevare per delantre la ponte vieya, foi el marcu escoyíu esta vegada polos militantes de la Xunta pa facer llegar otra vuelta más la so protesta al Presidente, una protesta que garra un aquello más dramático tres de l'apaición la selmana pasada de los preocupantes primeros datos de la II encuesta sociollingüística d'Asturies (ver noticia más p'abaxo). Anque la Guardia Civil mandó recular a los manifestantes, el discursu oficial del presidente a los vecinos quedó afogáu ente les voces de la protesta.