La Xunta paró'l Campus de La Vega

A les once y media de la mañana de güei, tres una negociación col rector Juan Vázquez, soltáronse los grupos de militantes de la Xunta Moza que dende les 8 taben encadenaos a toles puertes del uviéin Campus de La Vega, sé de la Facultá de Filoloxía, torgando cola so acción l'entamu del cursu académicu que tocaba emprincipiar güei en protesta pola situación de la titulación de Filoloxía Asturiana. L'actu desarrollose tranquilamente y ensin intervención nenguna de les fuerces de seguridá y énte'l plasmu y el sofitu de los alumnos y el profesoráu qu'asistíen al primer día de clas.Yá cola protesta en marcha, la Xunta púnxose en tratu col rectoráu p'algamar una entrevista col Rector Juan Vázquez pautare cola organización una entrevista'l llunes qu'entra pa falar de la situación del asturianu na universidá y de la reclamación pa sacar alantre la llicenciatura en Filoloxía Asturiana, que, anque tien el preste de la Xunta Xeneral del Principáu, yá van echándola p'atrás dos veces nel Conseyu d'Universidaes.La entrevista yá la prometiere'l rector el 18 de xineru, cuando la Xunta fizo un encierru nel edificiu históricu de la Universidá depués del segundu rechazu del Conseyu, pero como la cosa parez que quedó pa prau, la Xunta decidió facer esta protesta, la más fuerte dende va unos años p'acá nel ámbetu universitariu. Nel comunicáu qu'espardió la Xunta a los medios de comunicación sobre l'actu d'esta mañana, la organización quier remembrar que "la criación d'esta nueva llicenciciatura ye una decisión de los órganos de gobiernu de la nuesa Universidá, y que la so puesta en marcha ta siendo bloquiada en Madrid por un órganu de xestión universitaria, el Conseyu d'Universidaes, cola sida de que l'asturianu nun ye una llingua". Pa la Xunta, la culpa de la institución madrileña chisca tamién a los dirixentes de la universidá asturiana, en cuantes que "les persones que deberíen tar defendiendo los determinos de la nuesa Universidá, el rector Juan Vázquez y el conseyeru de cultura Javier Fernández Vallina, caltienen una actitú pasiva ente estos fechos y combayona coles resoluciones del Conseyu d'Universidaes"