La Xunta espubliza un single reivindicativu

La Xunta pola Defensa de la
Llingua vuelve a repetir esperiencia discográfica, y va presentar
esti sábadu un cantar fechu por dellos músicos asturianos pa
sofitar la revindicación llingüística n'Asturies. De la
mesma manera que va un añu salió a la cai aquel ¡FALA!, esta
vegada repítense munchos protagonistes d'aquel cantar pa esti "Un
pasu alantre".



La iniciativa de la Xunta vuelve a ser poné-y banda sonora a la
petición d'oficialidá n'Asturies, y pa ello cunta cola
collaboración d'una riestra de músicos na que vuelven a repetir los
más de los miembros de Dixebra que yá tocaron naquel
¡FALA!. de va un añu. Asina
la base rítmica cuerre al cargu de Sergio Rodríguez, técnicu de
soníu de Dixebra, y sobre ella tocaron los músicos de Dixebra y
otros collaboradores como l'antiguu xiblateru de Corquiéu Xurde
Fernández. El tema ye en xeneral de raigón hiphoperu, pero nelli
pue reconocese una danza prima pasada per una peñera "ragamufin", una estraña
mezcolanza que paga la pena sentir. Nes voces tán cantantes de grupos
con estilos bien estremaos, como Xune de Dixebra, Delfo Valdés de La
Tarrancha y K-Nalón, Navarro del grupu corveranu d'Hip Hop HDP y Dani
"Don Nadie", antiguu cantante d'Anarkía Positiva. La lletra foi un
trabayu conxuntu de toes estes persones, y fala d'un mundu
subrrealista nel que si l'asturianu nun existe, tampoco nun puen existir Asturies nin los
asturianos.



La edición del single va facese neto que'l ¡FALA!, como un discu
acompañáu con testos qu'espliquen cuála ye la
situación del asturianu y el trabayu que desenvuelve la Xunta
pa denunciar la so minorización. La
organización cuenta con presentalu, y ponelu a la venta, esti mesmu
sábadu nel Conciertu pola
Oficialidá qu'organiza l'asociación , y que va entamar a les
19:00 hores nel Campus d'Humanidaes d'Uviéu