La Xunta Eleutoral tresllada a la Fiscalía les declaraciones de Foro sobre’l votu emigrante

Les declaraciones del senador Isidro Martínez Oblanca sobre irregularidaes supuestes nel votu emigrante nun prestaron a la Xunta Eleutoral, que decidió informar a la Fiscalía. Considera que faen duldar sobre la so “oxetividá y imparcialidá”.
 
"Vistu que'l conteníu de les manifestaciones vertíes pola formación política Foro de Ciudadanos (FAC) nos medios de comunicación pon n'entredichu la oxetividá y imparcialidá d'esta Xunta Eleutoral, alcuérdase dar treslláu al Ministeriu Fiscal", señala al traviés d'un comunicáu. D'esta manera salió al pasu de les manifestaciones feches ayeri por Foro, que señaló qu'alcontrara 334 emigrantes que votaren nes eleiciones últimes ensin solicitar el sufraxu, tal como marca la llei eleutoral nueva.
 
Dende la Xunta Eleutoral afírmen qu'esa diferencia nun ye tal, y que too se desarrolló d'alcuerdu a la llei. Ello ye que nel comunicáu rellata tolos pasos que se dieron dende'l mes de marzu y hasta la fecha, y recuerda qu'en cumplimientu de lo dispuesto nel artículu 41.5 de la Llei Orgánica del Réxime Eleutoral Xeneral (Loreg) y del Acuerdu de la Xunta Eleutoral Central de 29 de setiembre del 2011, la Oficina del Censu Eleutoral fixo entrega a les formaciones polítiques que lo solicitaren una copia del Censo Electoral de Españoles Residentes Ausentes (CERA) cola información de les solicitúes de votu aceptaes a fecha 5 de marzu del 2012. El total yera de 4.163.
 
Pero con posterioridá, la Oficina del Censu Eleutoral siguió recibiendo solicitúes de votu CERA, tramitándose les llegaes dientro del plazu llegal –hasta'l 25 de febreru del 2012–, anque recibíes con posterioridá al 5 de marzu del 2012, de conformidá col Acuerdu de la Xunta Eleutoral Central de fecha 5 d'ochobre del 2011, según el que “la remisión pola Oficina del Censu Eleutoral de la documentación pal votu de los eleutores tendrá que facese, en too casu, siempre que sía posible d'esta manera l'exerciciu del derechu de sufraxu y faciendo una interpretación favorable al exerciciu del mesmu". D'esta manera, el ficheru pal escrutiniu de la CERA que s'entregó a la Xunta Eleutoral d'Asturies constaba de 4.826 solicitúes de votu aceptaes, cifra oficial que publicó'l día 26 de marzu del 2012 la Oficina de Censu Eleutoral na páxina web del Instituto Nacional de Estadística.
 
A lo último, señalen que l'escrutiniu públicu fechu pola Xunta Eleutoral el 28 de marzu del 2012, nel que s'alcontraben presentes los representantes, apoderaos y interventores de les distintes formaciones polítiques acreditaes pa tal actu, "comprobáronse tolos unvíos recibíos, introduciendo nes urnes puramente aquellos sobres de votación que veníen acompañaos de la correspondiente certificación censal, lo que verificaron los miembros de la Xunta Eleutoral d'Asturies col correspondiente llector ópticu".