La Xunta Eleutoral impide la celebración d'un actu pa conmemorar el 25 de mayu

Los Coleutivos d'Entidades Republicanes y Memorialistes convocantes acaten la decisión “por imposición y non por convencimientu”, y treslladen l'eventu a esti domingu.

La intención primera yera conmemorar l'aniversariu de la proclamación de soberanía de la Xunta Xeneral del 25 de mayu del 1808, llevantándose n'armes contra l'exércitu francés, al igual que fixera Asturias Laica xunto con otres asociaciones l'añu pasáu pa recordar esta fecha na que, pa munchos, debería celebrase'l Día d'Asturies en cuenta'l 8 setiembre, Día de la Santina. Al coincidir con xornada de reflexón por mor de la cita eleutoral del 26-M, "unvióse comunicáu a la Junta Electoral Provincial, que respondió desautorizando los actos previstos, ente otres razones afirmando que nun consta que se celebrara n'otres ocasiones".

Tres conocer esti dictame, y tres tratar l'asuntu na asamblea, decidióse treslladar l'actu al domingu, al meudía, "por imposición y non por convencimientu". Ésti va consistir nuna concentración na plaza la Catedral d'Uviéu, onde va esplicase a los presentes cómo se desendolcó'l la revuelta popular.

Darréu va facese un paséu cívicu hacia'l llugar onde tán les plaques conmemoratives del comienzu de la revuelta, na cai Cimavilla, u van lleese dellos testos al rodiu'l 25 de mayu, amás del manifiestu, tanto n'asturianu y castellanu, y va facese ufrienda floral. Al finar, los presentes van dirixise a la Caleya los Güevos, onde s'asitiaba l'Audiencia, llugar nel que se van esplicar los acontencimientos del 25 de mayu, pa terminar na Casa Conceyu pa entregar un escritu dirixíu alcalde pa la so participación nesta conmemoración nos años vinientes.