La Xunta Electoral nun proclama les candidatures d'Unidá

Nuna reunión celebrada güei pela mañana, la Xunta Electoral Provincial d'Asturies decidió nun proclamar les candidatures de la coalicíon UNIDÁ, integrada por Andecha Astur, Izquierda Asturiana y Los Verdes-Grupo Verde, pa les próximes elecciones autonómiques, una decisión que repercute tamién nes municipales, onde UNIDÁ probablemente tampoco pueda presentar les sos candidatures, yá que les Xuntes Electorales de Zona tienen por norma aplicar los criterios de la autonómica. Na resolución de la Xunta Electoral Provincial conseña qu'en virtú del artículu 44.3 de la Llei Electoral, qu'afita que nuna mesma circunscripción nun pueden presentase dos candidatures baxo la mesma nomenclatura y tómase en consideración la suspensión cautelar dictada pol xulgáu númberu 4 d'Uvieú del Conceyu Xeneral estraordinariu que debió celebráse'l 14 de marzu y afita a Arturu Bermeyu como secretariu xeneral d'Andecha Astur y a la executiva representada por él, selañando que "ostenta la máxima representación de la organización tanto interna como externamente". D'esti mou, segun la decisión de la Xunta, nengún representante llegal d'Andecha Astur robló un alcuerdu electoral pa inxerir a esa formación na coalición UNIDÁ.

Segun confirmaron a Asturies.com representantes de la coalición UNIDÁ, nes últimes hores de la mañana nun taben proclamaes les candidatures nin a la Xunta Xenreal nin al Conceyu de Xixón. En declaraciones a Asturties.com, d'Ignaciu Llope, candidatu nacional d'UNIDÁ, considera esta decisión "gravisima y ensin precedentes, una decisión amás política dafechu, siendo una amuesa de la baxa calidá democrática d'Asturies". Llope indicó que "inténtase escluir a la izquierda nacionalista de les elecciones". Refieriéndose al posicionamientu de la Xunta Electoral Provincial, comentó que "suelen inhibise nestos casos. Amás tomaron una decisión ensin entrar al fondu del asuntu, yá que los xulgaos nun se pronunciaron pola vía penal sobre quién ostenta la repesentación real d'Andecha Astur". Asimesmo confirmó que la coalición va recurrir la decisión pola via del contenciosu, pal que hai dende mañana un plazu de dos díes, y nel casu de ratificar la decisión de la Xunta Electoral "diremos al Consitucional y al d'Estraburgo si fai falta".