La Xunta Direutiva de la SGAE escueye a Hevia como presidente

El gaiteru maliayu sustitúi nel cargu a José Miguel Fernández Sastrón.

Aconceyada esta mañana, la Xunta Direutiva de la Sociedad General de Autores (SGAE) escoyó a José Ángel Hevia como presidente pa los cuatro años próximos. El músicu que llevó la gaita asturiana a tolos requexos del mundu recibió 20 de los 34 persones na reunión, na qu'hebo una ausencia, con 2 votos en contra y 12 astenciones.

"Trabayaré pol diálogu y l'entendimientu ente tolos que formamos esta Xunta Direutiva y seré'l presidente de toos y pa tolos socios que formen parte de la entidá. Tenemos un gran camín que percorrer hasta situar a esta entidá nos estándares d'eficacia y calidá que merez. La defensa del creador –grande o pequeñu, músicu, coreógrafu, cineasta o dramaturgu– será'l mio primer oxetivu”, foi la primer valoración d'Hevia.

Enantes de llegar a la presidencia, yá ocupara cargos na Xunta Direutiva, nel 2007 como miembru del Colegio de Pequeño Derecho y nel 2015, del Colegio de Editores al traviés de Busindre Producciones. Teo Cardala (Colegio de Pequeño Derecho), Antonio Onetti (Colegio Audiovisual), Fermín Cabal (Colegio de Gran Derecho) y Clifton J. Williams por Alabama Music Business (Colegio de Editores) salieron escoyíos como vicepresidentes.

Semeya obra de XIIIfromTOKYO baxo llicencia CC BY-SA 3.0.