La Xunta detecta bona disposición en Pérez Ornia

La Xunta Pola Defensa de la Llingua, que tien convocada pa esti domingu a la 1 na escalerona de Xixón una concentración de protesta pol tratamientu del asturianu na TV autonómica, tuvo ayeri una entrevista col máximu responsable del Ente Autonómicu de Comunicación, José Ramón Pérez Ornia y el restu del equipu directivu del Ente, pa da-y a conocer les reivindicaciones de la organización sobre l'inxerimientu del asturianu na canal de TV pública, que va tar en condiciones d'emitir con estabilidá pa la primavera del 2006.

El director del Ente comunicó-yos a los representantes de la organización cívica la so "sensibilidá" pa col tema del asturianu y solicitó de la organización un contactu más estrenchu con vistes a conocer los sos puntos de vista y que la Xunta pueda aportar les sos idees a la directiva del Ente. Los representantes de la Xunta Pola Defensa de la Llingua comentaron a Asturies.com que, con ser bona la disposición, na entrevista rescampló que l'Ente, con tener prevista una cierta presencia del asturianu nes sos emisiones, nun ta en condiciones de concretar el qué, el cuanto, el como y el cuando d'estes emisiones en cuantes que l'organismu nun dispón de nenguna estructura interna nin de mecanismu esternu de normalización llingüística que planifique la presencia del asturianu, estremu que confirmó les peores previsiones de los representantes de la Xunta.

La delegación de la Xunta Pola Defensa de la Llingua insistió énte Ornia na so argumentación de que la TV asturiana tien de ser una tabla de salvación pal asturianu, presentándolu como una llingua de comunicación, y non convertise nuna bomba contra la so supervivencia presentando situaciones cotidianes de la vida asturiana nun monollingüismu castellanu dañible pa la conciencia de los falantes. Otru de los puntos sobre los que llamaron l'atención los representantes de la Xunta foi'l fechu de que contra l'usu del asturianu na TV esiste una negativa por parte de la élite política, pero esi sentimientu de refuga nun se da na sociedá asturiana, qu'acepta con normalidá los conteníos falaos, televisaos y escritos nuna llingua que nun-y resulta estraña, una tésis cola que la Xunta quier desmontar los argumentos de los políticos que ven problemática la entrada del asturianu na TV

Nel trescursu de la entrevista los representantes de la Xunta tuvieron accesu al informe del Institutu Adolfo Posada nel que s'inxeren los condicionantes llegales pal reconocimientu del asturianu nes prebes d'accesu a los puestos de trabayu nel Ente. Según esti informe, el conocimientu del asturianu "nun ye imprescindible nin tampoco necesario".