La Xunta denuncia'l desaniciu "en tiempu real" de la llingua asturiana

Los esmolecedores primeros datos del II Estudiu Sociollingüísticu d'Asturies dirixíu pol caderalgu de socioloxía Francisco Llera Ramo saltaron l'alarma ente tolos sectores preocupaos pola conservación del idioma. La Xunta Pola Defensa de la Llingua Asturiana, la organización cívical más representativa na llucha pol reconocimientu de la dignidá del idioma, ta acabante d'espublizar una valoración d'estos datos. La Xunta reconoz que, ente la primer encuesta del 91 y esta del 2002, la situación del asturiano ye una migaya meyor nel planu de la conocencia, mientres que nel de les voluntaes, la ciudadanía sigue viendo la normalización llingüística con mui bon aquello. Por embargu, ye nel planu nel del usu, onde l'asturiano recula espectacularmente, calificando la Xunta la situación de dramática. Ente otros datos, la valoración de la Xunta solliña'l fechu de qu'el númberu d'asturianos que reconocen tener l'asturiano como llingua materna baxe un 30% sobre'l total de la población d'Asturies, llevando a que nel espaciu d'estos once años Asturies perdiere un 45'5% de los falantes d'asturiano. Too esto lleva a afirmar a la Xunta que l'asturiano carez "un procesu de desaniciu visible en tiempu real" favorecíu por "un fundimientu gravísimu de la tresmisión xeneracional del idioma"La Xunta ve nesti retrocesu, que diz que "nun tien precedentes" una responsabilidá política directa y que llinda cola culpabilidá, porque queda clara "l'absoluta inutilidá de les polítiques cosmétiques de supuesta promoción del asturiano". Pa la Xunta, el Gobiernu del Principáu d'Asturies, que tien la ente les sos responsabilidaes, por mandatu estatutariu, curiar l'idioma propiu d'Asturies, "habría tomar mui bona nota d'estos datos, sobremanera teniendo en cuenta que na encuesta, el 81% de los asturianos diz que'l gobiernu nun cumple con esa responsabilidá". La Xunta pide como preseos pa iguar esta situación a aplicar inmediatamente la declaración d'oficialidá y el desarrollu d'unes polítiques de normalización llingüística "series, comprometíes y que trescalen tola acción del gobiernu".