La Xunta, decepcionada na entrevista col Rector

Una delegación de la Xunta Moza aconceyó ayeri col rector de la Universidá d'Uviéu, Juan Vazquez, pa falar sobre l'asuntu de la llicenciatura en Filoloxía asturiana y sobre la normalización del idioma asturianu nel sen de la institución académica.La entrevista col rector, que Xunta Moza yá solicitare delles vegaes ensin rempuesta denguna dende'l rectoráu, acabó forzándose gracies a l'acción de protesta de la otra selmana, cuando grupos de militantes de la organización xuvenil s'encadenaron a les puertes del Campus de La Vega en señal de protesta. La entrevista, que duró más d'una hora, dio pa falar tanto del futuru de la llicenciatura en Filoloxía Asturiana como de les midíes que pudieren tomase na institución académica pa normalizar l'asturianu na universidá. Sobre'l primer puntu del orde del día, Juan Vázquez remachó lo que vien diciendo dende qu'entamó la polémica, remembrando qu'elli, como rector, poco más pue facer que cumplir colos mandatos de la Xunta de Gobiernu de la Universidá y llevar alantre la petición. Nesti sentíu, Vázquez, que se quexó pola protesta de la otra selmana na Facultá de Filoloxía, vieno a espresar que les protestes hai que llevales contra'l conseyu d'Universidaes, un ente superior contra'l que eli yá nun tenía autoridá. El rector dixo qu'elli yera'l primer interesáu en qu'hubiere la titulación pol prestixu académicu que-y da a la institución que dirixe.Si pa los representantes de la Xunta la esplicación del rector nesti asuntu nun aportó nada nuevo, más malcontentos quedaron cuando-y plantegaron a Juan Vázquez la posibilidá d'entamar campañes de normalización na universidá. Dende Xunta Moza apuntáronse delles midíes concretes como, por poner un casu, ufiertar impresos de matriculación nos dos idiomes p'avanzar nesti sentíu, pero Vázquez refugó dafechu tala posibilidá. Según-yos esplicó'l rector a los miembros de Xunta Moza, eso podría dar llugar a que otra xente se sintiere discriminao pola imposición del asturianu y a que se llevantaren en consecuencia protestes más que xustificaes dientro de la universidá. El rector dixo-yos a los representantes de la Xunta qu'amás nun taba demostrao que l'asturianu fore un idioma y qu'ellos nun yeren naide pa querer imponelo. Otramiente, el rector avisó de que nun pensaba tolerar más actos como'l de la otra selmana y que per esi camín nun diben nenyures.La Xunta Moza, decepcionada del resultáu de la entrevista col másimu responsable de la institución académica, estudiará que facer d'agora en p'alantre con esti asuntu, que va torciéndose más según pasa'l tiempu.