La Xunta de Toponimia trabaya nel espediente del Conceyu de Siero

La Xunta de Toponimia del Principáu d'Asturies entamó ayeri'l llabor pa llevar alantre l'espediente colos nomes de llugar tradicionales del Conceyu de Siero. Más de 900 nomes de pueblos, llugares y parroquies van tar nesti espediente que va inxertar bien de nomes que nun taben conseñaos en trabayos anteriores.

El nomenclator de l'Academia de la Llingua Asturiana y otros informes monográficos d'esta institución son la base pal trabayu en Siero, onde la Xunta de Toponimia cuenta tamién con informes de campu del mesmu conceyu, que tien un trabayu sobre toponimia desarrolláu pol Cecodet de la Universidá d'Uviéu y l'asesoramientu d'Esther Fonseca y Llinu Álvarez Santidrián, amás de l'ayuda de l'archivera Rosa Villa y del responsable de la oficina de política llingüística de Siero Xosé Firmu García. El tamañu y densidá de población del conceyu van obligar a un estudiu mui pormenorizáu, anque se cuenta con poder rematalu cola oficialización definitiva de los topónimos nun plazu de trés meses.

La Xunta de Toponimia entamó yá na presente llexislatura un total de 43 espedientes toponímicos, de los que diez yá tan aprobaos en Conseyu de Gobiernu y asoleyaos en BOPA. Anque nesti añu 2006 entovía nun s'aprobó oficialmente nengún espediente, les previsiones de política llingüística pasen por que los de Nava y La Ribera s'aprueben d'equí a la vuelta poco.