La Xunta de Toponimia aconceyó en Piloña

La Xunta de Toponimia del Principáu d'Asturies aconceyó ayeri en Piloña, onde fexo una primer sesión pa tratar l'espediente qu'ha oficializar los nomes tradicionales de les parroquies y llugares d'esti conceyu, que ye ún de los más grandes d'Asturies colos sos cerca de 300 kilómetros cuadraos repartíos en 24 parroquies.

De fechu, ún de los aspectos que más llamaron l'atención de los responsables de la Xunta de Toponimia foi la gran cantidá de topónimos que nun taben conseñaos n'estudios anteriores y que tán faciendo del de Piloña ún de los estudios más pormenorizaos, pa lo que se cuenta col trabayu de campu del espertu Iván Huerga. El director de Política Llingüística apuntó que'l trabayu parte, como davezu de la base qu'apurre volume "nomes de conceyos, parroquies, pueblos y llugares d'Asturies" y emponderó la collaboración del alcalde Juan Roberto Perez.

Hasta agora son diez los conceyos los que yá tienen oficializaos los sos nomes de llugar cola apaición de los sos espedientes en Boletín Oficial del Principáu d'Asturies, que son Carreño, El Franco, Llanes, Gozón, Llangréu, L.lena, Sariegu, Cabranes, Bimenes, y Villaviciosa. Otros diez, que son Nava, Ayer, La Ribera, Llaviana, Colunga, Morcín, Riosa, Pezós, Grandas de Salime y Samartín del Rei Aurelio tán esperando pa pasar el trámite en Conseyu de Gobiernu, mientres que son yá un total de 42 conceyos los que solicitaron dende la constitución de la Xunta de Toponimia que s'ellaboraren los sos espedientes pa recuperar los sos nomes de llugar tradicionales.