La Xunta de Personal señala que los recortes lleven “al esmantelamientu de la escuela pública asturiana”

La Xunta de Personal Docente non Universitariu considera que la decisión del Gobiernu de recortar la plantiya de maestros “lleva al esmantelamientu de la escuela pública asturiana”. Educación quier suprimir 288 places docentes pal cursu próximu.
 
Esti órganu nel que tan representaos tolos sindicatos educativos aprobó güei por unanimidá, en conceyu estraordinariu, una resolución na que refuga “de manera enérxica la propuesta de plantiya diseñada pola Alministración pal cursu 2011/2012”. Nun primer momentu, Educación pretendía recortar 336 puestos de trabayu, anque delles sesiones de negociación na Mesa Seutorial permitió que l’Alministración baxara hasta los 288, una cantidá que, n’opinón de la Xunta de Personal, lleva “al esmantelamientu de la escuela pública asturiana, hacia’l deterioru na calidá de l’atención educativa y la perda del caráuter compensador de la educación”.
 
“El recorte feroz de plantiyes dexa a los centros mui lloñe de les sos necesidaes reales de funcionamientu. Convierte l’emplegu docente estable n’inestable y, como consecuencia, aumenta la precarización na contratación. Puestos fixos, esto ye, trabayu estable, conviértense en ‘necesidaes funcionales’, en trabayu precariu”, apunten dende la Xunta de Personal, que considera que con estes decisiones “tornamos a los vieyos tiempos nos que los recortes grandes derivaben del descensu de la población escolar. Agora, por contra, a más alumnáu, plantiyes insuficientes, siendo la razón economicista dafechu”. Dende l’organismu recuerden qu’a estes 288 places docentes del cursu próximu hai qu’añadir otros 300 suprimíos en setiembre pal profesoráu interín. Mentes, los centros educativos cuenten con 2.000 alumnos más.
 
La resolución de la Xunta de Personal tamién recueye otros puntos importantes como la denuncia del incumplimientu de plantiyes, tanto d’Infantil y Primaria como de Secundaria, y d’itinerancies por parte de l’Alministración; y la esixencia del cumplimientu de los alcuerdos firmaos y d’entrega de tola información necesaria de cara a efeutar negociaciones futures. Tamién encamienta al profesoráu a participar nes movilizaciones que van celebrase pol tema de la supresión de plantiyes, como un paru de diez minutos previstu pal 28 de marzu. Esi día, la Xunta de Persona va celebrar un conceyu estraordinariu nuevu en Cangas del Narcea.