La Xunta de Personal Docente sofita la manifestación d’esti sábadu en defensa del asturianu na enseñanza

La Xunta de Personal Docente non Universitariu aprobó una resolución sobre la situación de la Llingua Asturiana nel currículum d'Educación Primaria na que fai un llamáu a la participación ciudadana na manifestación del próximu sábadu 17 de febreru en defensa de la presencia de la llingua asturiana nel sistema educativu y que convoquen los sindicatos d'enseñanza SUATEA, CCOO y FETE-UXT xunto cola Xunta Pola Defensa de la Llingua Asturiana.

Les organizaciones convocantes califiquen de "agresión a la llingua asturiana" la propuesta de currículu pa primaria fecha pola Conseyería d'Educación y presenten la manifestación como un actu n'esixencia d'una redacción del currículu que garantice la presencia de la llingua asturiana "en toles escueles, en condiciones dignes y de normalidá".

Los convocantes de la manifestación defenden el "derechu al accesu al estudiu y conocimientu de la llingua asturiana" dalgo qu'afirmen que "reconoz la llexislación y ha garantizase ensin escepción", polo qu'entienden que "l'asignatura de Llingua Asturiana ha ser d'ufierta obligatoria en tolos centros d'educación primaria y ensin ratios de mínimos que fagan que'l derechu a estudiar asturianu dependa de la escoyeta d'otros compañeros".

Les entidaes que convoquen la manifestación piden que se garantice que l'asignatura nun compita con otres materies, un puntu que llevantó la polémica al apaecer a últimos del pasáu mes de xineru la propuesta de curriculum educativu pa la primaria asturiana. El borrador del documentu, anque por primer vegada-y daba desarrollu curricular a l'asignatura d'asturianu, facíalo dándo-y a l'asignatura de llingua un estatus d'inferioridá na práctica sobre les condiciones en que s'imparte agora y poniéndola a compètir, de fechu, con otres materies optatives. La rabasera de quexes dende los sindicatos y organizaciones de sensibilidá asturianista llevó al Conseyeru d'Educación, José Luis Iglesias Riopedre, a ofrecese a facer una corrección del documentu, pero les promeses del titular d'enseñanza nun son abondo pa los sindicatos y la Xunta Pola Defensa de la Llingua Asturiana, que dulden de los términos en que vaya facese la rectificación y piden negociala directamente con Educación. Los convocantes camienten tamién que ye'l momentu d'abrir la posibilidá de que la llingua asturiana s'emplegue como llingua vehicular na enseñanza d'otres materies y de que s'estabilice al profesoráu que la imparte.

L'últimu sofitu a la marcha de protesta vieno de la Xunta de Personal Docente non Universitariu, organismu que se manifestó tamién a favor de la Llingua Asturiana se declare oficial "pa evitar nel futuru esta situación discriminatoria". L'organismu docente esixe la "constitución d'un área de Llingua y Cultura Asturiana, y nel so casu de Gallego-Asturianu" y lapertura "inmediata" de negociación sobre la situación d'esta asignatura en tol sistema educativu.