La Xunta de Personal Docente llama a la solidaridá con Beatriz Quirós y Jesús de La Roza

La Xunta de Personal Docente non Universitariu d'Asturies emitió ayeri un comunicáu solidarizándose cola situación de dos de los sos delegaos sindicales, Beatriz Quirós y Jesús de la Roza, que tienen que comparecer a un xuiciu de faltes convocáu pal día 2 de marzu, a las 10, nel Xulgáu de lo Penal nº 2 de Xixón, acusaos pola policía de "insultar a l'autoridá" y "intentar romper un cordón policial".

Los supuestos fechos remóntense a la protesta que fexeron estudiantes y profesores contra la cesión d'espacios na Universidá Llaboral a la empresa Thyssen-Krupp que tuvo llugar na inauguración, el pasáu 16 de xineru, de la Escuela Superior d'Arte Dramáticu (ESAD).

La Xunta de Personal Docente sorraya que los dos sindicalistes acusaos acudieron ellí en calidá de delegaos sindicales y pa falar con alumnos y profesores del Centru y facer declaraciones a los medios de comunicación. Según s'esplica la concentración foi absolutamente tranquila, como pudo verse nes informaciones recoyíes polos medios de comunicación, que nun fexeron mención a incidentes. La policía procedió a identificar a los dos sindicalistes a abandonar el llugar ensin alegar causa dalguna, recibiendo Quirós y de La Roza a los pocos díes el llamáu pa presentase al xuiciu por faltes que va celebrase esti vienres.



El comunicáu de la Xunta de Personal Docente sorraya que situaciones como esta ponen en xuiciu los derechos sindicales y l'actuación de les persones que representen a los trabayadores, nesti casu los de la enseñanza, un colectivu de más de 12.000 trabayadores que faen d'esti sector "la mayor empresa d'Asturies" al dicir de la Xunta de Personal, que llama a acudir a les puertes de los xulgaos en solidaridá colos acusaos a la hora del xuiciu.