La Xunta cuélgase n'El Milán

Ayeri martes pela mañana, miembros de la Xunta Moza pola Defensa de la Llingua Asturiana protagonizaren un espectacular actu de protesta nel Campus d' Humanidaes de la universidá d'Uviéu. La Xunta convocó una concentración de protesta pol tratu denigrante que la llingua asturiana recibe de les instituciones y que tuvo como últimos episodios la negativa del Conseyu d'Universidaes d'España a aprobar los nuevos planes d'estudios de Filoloxía por incluyir l'asignatura optativa d'asturianu énte la inhibición del rectoráu y el Gobiernu asturianu que previamente los dieren por bonos, o la indignante denominación propuesta dende la Conseyería pa l'asignatura d'asturianu: "lengua tradicional: bable/asturiano".
Al mesmu tiempu que un numberosu grupu de xente se xuntaba delantre de la Facultá de Filoloxía al llamáu de la Xunta, dellos miembros d'esta asociación ciudadana que trabaya polos derechos llingüísticos del país colgáronse de la ponte que xunta los dos grupos d'edificios del campus y mangaron una pancarta firmada por Xunta Moza (estaya xuvenil de la Xunta) na que se pidía la dimisión del Conseyeru d'Educación y Cultura y del Rector y reclamando la titulación de Filoloxía Asturiana.
L'acción dexó asoráu al públicu asistente y a tolos que pasaben peles facultaes d'humanidaes a eses hores, ensin que se diera nengún tipu d'incidente más que l'aplausu de tolos congregaos ende.
D'allá a un cachu, los miembros de Xunta moza posáronse, pero la pancarta quedó na ponte como un gritu deseperáu ente la inxusticia y la sordera de los que tienen la posibilidá de iguar esta vergüenza.
Nel comunicáu qu'acompaña a l'acción, la Xunta denuncia l'actitú "combayona de los másimos representantes de la Universidá y alministración" pidiendo la dimisión inmediata del rector Juan Vázquez y del conseyeru de cultura Javier Fernández Vallina.Si quies, pues ver esti reportaxe gráficu con semeyes de l'acción.